ଏମିତି ବାପାଙ୍କୁ କୋଟି ପ୍ରଣାମ, ଦୁଇ ପୁଅଙ୍କ ପାଇଁ ପାଲଟି ଯାଇଛନ୍ତି ମାଆ

କେତେବେଳେ ମାଆର ଭୂମିକା ତୁଲାଉଛନ୍ତି ତ ଆଉ କେତେବେଳେ ବାପାର ଭୂମିକା ତୁଲାଉଛନ୍ତି । ସେଥିପାଇଁ ଏ ବାପା ଅନ୍ୟ ବାପାଙ୍କ ପାଇଁ ହୋଇଛନ୍ତି ଉଦାହରଣ ।

ମୟୂରଭଞ୍ଜ ଜିଲ୍ଲା ଉଦଳା ବ୍ଲକ ଡିମ୍ବଗଡିଆ ପଞ୍ଚାୟତ ଯଦୁଖୁଣ୍ଟା ଗ୍ରାମର ଏ ହେଉଛନ୍ତି ଶଙ୍କରା ମୁର୍ମୁ । ପରିବାର କହିଲେ ୧୧ ବର୍ଷର ପୁଅ ଫୁଦାନ ଓ ୭ ବର୍ଷର ପୁଅ ସାକିଲା ମୁର୍ମୁ । ଆଜକୁ ୪ ବର୍ଷ ପୂର୍ବରୁ ସ୍ତ୍ରୀ ସୁଗି ମୁର୍ମୁ କିଡନୀ ରୋଗରେ ପୀଡ଼ିତ ହୋଇ ଆରପାରିରେ । ସ୍ତ୍ରୀଙ୍କର ମୃତ୍ୟୁ ପରେ ଦୁଇ ପୁଅଙ୍କ ଦାୟିତ୍ୱ ତାଙ୍କ ଉପରେ । ମୂଲ ଲାଗି ଶଙ୍କରା ଯାହା କିଛି ରୋଜଗାର କରନ୍ତି ତିନି ପ୍ରାଣୀ କୁଟୁମ୍ବ ଯାହା ଯେମିତି ଚାଲି ଯାଆନ୍ତି । ଯେତେ ଦୁଃଖ କଷ୍ଟ ଥିଲେ ମଧ୍ୟ ଦୁଇ ପୁଅଙ୍କ ଖୁସି ପାଇଁ ଶଙ୍କରା ନିଜର କଷ୍ଟ କୁ ଭୁଲିଯାନ୍ତି । ଏପଟେ ଶଙ୍କରାଙ୍କ ସାନ ପୁଅ ସାକିଲା ଜଣେ ଦିବ୍ୟାଙ୍ଗ । ତଥାପି ପୁଅର ଯତ୍ନ ନେବାରେ ସେ କେବେବି ଅବହେଳା କରନ୍ତି ନାହିଁ ।

ସ୍ତ୍ରୀଙ୍କ ଅକାଳ ବିୟୋଗ ପରେ ଏବେ ସ୍ତ୍ରୀଙ୍କ ଫଟୋକୁ ଦେଖି ମନେ ପକାଉଛନ୍ତି ଶଙ୍କରା । ତେବେ ସେ ଆଜି ପର୍ଯ୍ୟନ୍ତ ନିଜେ ହାର ମାନିନାହାଁନ୍ତି । ଦୁଇ ପୁଅଙ୍କ ଦୁଃଖରେ ଦୁଃଖି ଓ ପୁଅ ମାନଙ୍କ ସୁଖରେ ସୁଖୀ ହୋଇ ନିଜର କର୍ତ୍ତବ୍ୟରେ କରିଚାଲିଛନ୍ତି । ଏହିପରି କି ନିଜର ଦୁଇ ପୁଅଙ୍କ ଖୁସି ଦେଖିବା ପାଇଁ ସେ ଦ୍ଵିତୀୟ ବିବାହ କରିବେ ନାହିଁ ବୋଲି କହିଛନ୍ତି । ଦୁଇ ପୁଅଙ୍କୁ କିପରି ବଡ଼ କରି ମଣିଷ କରିବେ ସେଥିପାଇଁ ସେ ସବୁ କିଛି ଭୁଲି ଯାଇଛନ୍ତି । ତାଙ୍କର ଏହି ମହାନତା ପାଇଁ ସମସ୍ତଙ୍କ ଠାରେ ପ୍ରିୟର ପାତ୍ର ହୋଇପାରିଛନ୍ତି ।

ସତରେ ଏହି ଉଦାରବାଦୀ ବାପାଙ୍କୁ ଦେଖିଲେ ଆଖିରୁ ଲୁହ ଝରି ଆସିବ । ମାଆ ପରି ପିଲା ମାନଙ୍କୁ ରୋଷେଇ କରି ଖାଇବାକୁ ଦେବା, ଗାଧୋଇ ଦେବା, ଶୁଆଇ ଦେବା ଓ ମୁଣ୍ଡ କୁଣ୍ଡାଇ ଦେବା ପରି ସବୁ କିଛି କରିଥାନ୍ତି ଶଙ୍କରା । ଏହିପରି କି ଦୁଇ ପୁଅଙ୍କ ଆଖିରେ ଲୁହ ପୋଛି କହୁଛନ୍ତି ତୁମେ ଦୁଇ ଜଣ ମୋର ସବୁକିଛି । ମୁଁ ତୁମ ମାନଙ୍କୁ କେବେ ପର କରି ପାରିବି ନାହିଁ । ଠିକ୍ ସେହି ପରି ବାପାଙ୍କ ଦୁଃଖରେ ଦୁଃଖୀ ହୋଇ ଏମିତି ବାପା ଜଗତେ ନାହିଁ ବୋଲି କହିଛନ୍ତି ଦୁଇ ପୁଅ । ସତରେ ଶଙ୍କରା ଅନ୍ୟ ବାପାଙ୍କ ପାଇଁ ପ୍ରେରଣା ।

ପ୍ରତ୍ୟେକ ସନ୍ତାନର ସାହସ, ଶକ୍ତି ଓ ପରିଚୟ ହେଉଛି ତା ବାପା । ବାପାର ହାତ ମୁଣ୍ଡରେ ଥିଲେ ଲାଗେ ସାରା ଜଗତଟା ଯେମିତି ତାର । ତେବେ ଭଳି ଜଣେ ବାପାଙ୍କୁ ପାଇ ମାଆ ନଥିବାର ଦୁଃଖକୁ ଭୁଲିପାରିଛନ୍ତି ଦୁଇ ପୁଅ । ସତରେ ଏମିତି ବାପାଙ୍କୁ କୋଟି ପ୍ରଣାମ ।