‘ବାପା ବଞ୍ଚାଅ.’ କହି ଦୌଡ଼ିଲେ ୨ ସ୍କୁଲ ଛାତ୍ରୀ, ଶୂନ୍ଶାନ ରାସ୍ତାରେ ଅସଦାଚରଣ କରୁଥିବା ୪ ଯୁବକ ଫେରାର୍
ଉତ୍ତର ପ୍ରଦେଶର ଦେଓ୍ୱରିଆରେ ୨ ସ୍କୁଲ ଛାତ୍ରୀ ଦିନ ଦ୍ୱିପ୍ରହରରେ ଅସଦାଚରଣର ଶିକାର ହୋଇଛନ୍ତି । ୮ମ ଶ୍ରେଣୀରେ ପଢୁଥିବା ଏହି ଛାତ୍ରୀ ଦ୍ୱୟ ପରୀକ୍ଷା ଦେଇ ସ୍କୁଲରୁ ଫେରୁଥିଲେ । ଏହି ସମୟରେ ବାଇକ୍ରେ ୪ ଜଣ ଯୁବକ ଆସି ସେମାନଙ୍କୁ ଅସଦାଚରଣ କରିଥିଲେ । ପୂରା ଘଟଣା ସେଠାରେ ଲାଗିଥିବା ସିସିଟିଭିରେ କଏଦ ହୋଇଛି ।
ସୂଚନା ମୁତାବକ, ଯୁବକମାନେ ସ୍କୁଲ ଛାତ୍ରୀଙ୍କୁ ଶୂନ୍ଶାନ ରାସ୍ତାରେ ଅସଦାଚରଣ କରିବା ବେଳେ ଛାତ୍ରୀ ଦୁଇଜଣ ସାଇକେଲରୁ ପଡ଼ିଯାଇଥିଲେ ।
ଏହାପରେ ଜଣେ ଯୁବକ ଜଣେ ଛାତ୍ରୀଙ୍କୁ ପାଖ ଧାନ କିଆରୀକୁ ନେଇଯିବାକୁ ଚେଷ୍ଟା କରୁଥିଲେ । ଏହି ସମୟରେ ଛାତ୍ରୀ ଦ୍ୱୟ ଚିତ୍କାର କରିଥିଲେ ।
ସେପଟେ ଜଣେ ଛାତ୍ରୀ ଜୋର୍ରେ ଚିତ୍କାର କରି ସେଠାରୁ ଦୌଡ଼ିବାକୁ ଲାଗିଲେ । ଏହାପରେ ସ୍ଥାନୀୟ ଲୋକମାନେ ପାଟି ଶୁଣି ସେଠାରେ ପହଞ୍ଚିଥିଲେ । କିନ୍ତୁ ସେତେବେଳକୁ ବାଇକ୍ ଆରୋହୀମାନେ ମଉକା ଦେଖି ଖସି ପଳାଇ ଯାଇଥିଲେ । ଖବର ଅନୁସାରେ, ଦୁଇ ଜଣ ଛାତ୍ରୀ ପରୀକ୍ଷା ଦେବାକୁ ଯାଇଥିଲେ । ପରୀକ୍ଷା ଦେଇ ଘରକୁ ଫେରୁଥିବା ବାଟରେ ସେମାନଙ୍କ ସହିତ ଏଭଳି ଘଟଣା ଘଟିଥିଲା ।
ଘଟଣା ସମ୍ପର୍କରେ ସୂଚନା ଦେଇ ଦେଓ୍ୱରିଆ ଏସ୍ପି ସଂକଳ୍ପ ଶର୍ମା କହିଛନ୍ତି ଯେ ୨ ସ୍କୁଲ ଛାତ୍ରୀଙ୍କୁ ବାଇକ୍ ଆରୋହୀ କିଛି ଯୁବକ ପିଛା କରି ଅସଦାଚରଣ କରିଥିବାର ସୂଚନା ମିଳିଛି । ଛାତ୍ରୀ ଦ୍ୱୟ ଏ ନେଇ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ସମ୍ବନ୍ଧିତ ଧାରାରେ ମାମଲା ରୁଜୁ କରାଯାଇଛି ।
ଘଟଣାର ତଦନ୍ତ ପାଇଁ ୫ ଜଣିଆ ଟିମ୍ ଗଠନ କରାଯାଇଛି । ଯଦିଓ ବର୍ତ୍ତମାନ ଅଭିଯୁକ୍ତମାନଙ୍କୁ ଚିହ୍ନଟ କରାଯାଇ ପାରିନାହିଁ । ସେମାନଙ୍କୁ ଚିହ୍ନଟ ପାଇଁ ସିସିଟିଭି କ୍ୟାମେରାର ସହାୟତା ନିଆଯାଉଛି । ଏହା ସହିତ ଛାତ୍ରୀମାନଙ୍କୁ ମଧ୍ୟ ଅଭିଯୁକ୍ତମାନଙ୍କ ବିଷୟରେ ପଚରାଉଚରା କରାଯାଉଛି । ଖୁବ୍ ଜଲ୍ଦି ସେମାନଙ୍କୁ ଗିରଫ କରାଯିବ ବୋଲି ପୋଲିସ କହିଛି ।
