ମଧ୍ୟପ୍ରଦେଶ ପରିବହନ ବିଭାଗ (ଆରଟିଓ)ର ପୂର୍ବତନ କନଷ୍ଟେବଳ ସୌରଭ ଶର୍ମାଙ୍କ ଘରୁ କୋଟି କୋଟି ଟଙ୍କା ଜବତ କରିଛି ଲୋକାୟୁକ୍ତ ଏବଂ ଆୟକର ବିଭାଗ । ଲୋକାୟୁକ୍ତ ସ୍ପେଶାଲ ପୋଲିସ ଏଷ୍ଟାବ୍ଲିସମେଣ୍ଟ (SPE)ର ଭୋପାଳ ୟୁନିଟ୍ ଆୟଠାରୁ ଅଧିକ ସମ୍ପତ୍ତି ଠୁଳ ମାମଲାରେ ଗୁରୁବାର ସୌରଭ ଶର୍ମାଙ୍କ ଘରେ ଚଢ଼ାଉ କରିଥିଲା । ପୋଶ୍ ଅରେରା କଲୋନୀରେ ଥିବା ତାଙ୍କ ଘରୁ ଚଢ଼ାଉ ବେଳେ ୨.୮୫ କୋଟି ନଗଦ ଟଙ୍କା ଜବତ କରାଯାଇଛି । ଏହା ସହିତ ୪୦ କିଲୋ ଚାନ୍ଦି, ଅନ୍ୟାନ୍ୟ ଦାମୀ ଜିନିଷ ଏବଂ ଚଳନ୍ତି, ଅଚଳନ୍ତି ସମ୍ପତ୍ତିର କାଗଜପତ୍ର ମଧ୍ୟ ମିଳିଛି ।
ସୂଚନା ମୁତାବକ, ସୌରଭ ଶର୍ମାଙ୍କ ଘରେ ଚଢ଼ାଉ ବେଳେ ୪୦ କିଲୋଗ୍ରାମ ଚାନ୍ଦି ଭର୍ତ୍ତି ବ୍ରିଫକେସ୍ ମିଳିଥିଲା । ଲୋକାୟୁକ୍ତ ଅଧିକାରୀମାନେ ୫୦ ଲକ୍ଷ ଟଙ୍କାର ସୁନା ଅଳଙ୍କାର ଏବଂ ସମ୍ପତ୍ତି ସହ ଜଡ଼ିତ କାଗଜପତ୍ର ଜବତ କରିଛନ୍ତି । ବର୍ତ୍ତମାନ ଏଗୁଡ଼ିକର ଯାଞ୍ଚ ଚାଲିଛି ।
ପୂର୍ବତନ କନଷ୍ଟେବଳଙ୍କ ଘରୁ ଜବତ କରାଯାଇଥିବା ମୋଟ ସମ୍ପତ୍ତିର ମୂଲ୍ୟ ୩ କୋଟି ଟଙ୍କାରୁ ଅଧିକ ବୋଲି ଆକଳନ କରାଯାଇଛି । ଲୋକାୟୁକ୍ତ ଏଡିଜି ଜୟଦୀପ ପ୍ରସାଦ କହିଛନ୍ତି, ତାଙ୍କର ଦୁଇଟି ଠିକଣାରେ ଚଢ଼ାଉ କରାଯାଇଥିଲା । ସକାଳ ୭ଟାରେ ଦୁଇଟି ଟିମ୍ ଯାଞ୍ଚ ପାଇଁ ବାହାରିଥିଲା ।
ତାଙ୍କ ସହଯୋଗ କୁହାଯାଉଥିବା ଚନ୍ଦନ ସିଂ ଗୌରଙ୍କ ଘରେ ମଧ୍ୟ ଖୋଜାଖୋଜି କରାଯାଇଥିଲା । ଏହାଛଡ଼ା ସୌରଭଙ୍କର ଏକ ହୋଟେଲରେ ଚଢ଼ାଉ କରି ଅଧିକାରୀମାନେ ଯାଞ୍ଚ କରିଥିଲେ । ଜଣେ ଅଧିକାରୀ କହିଛନ୍ତି ଯେ ତାଙ୍କ ବିରୋଧରେ ଅଭିଯୋଗର ଯାଞ୍ଚ ପରେ ଖୋଜାଖୋଜି କରାଯାଇଥିଲା ।
ପରିବହନ ବିଭାଗରେ ୧୨ ବର୍ଷ ପରେ ସୌରଭ ପ୍ରାୟ ବର୍ଷେ ପୂର୍ବରୁ କନଷ୍ଟେବଳ ପଦରୁ VRS ନେଇଥିଲେ ଏବଂ ଏହାପରେ ବିଲ୍ଡର ହୋଇଥିଲେ । ସରକାରୀ ଚାକିରିରେ ଥିବା ସମୟରେ ବି ସେ ସମ୍ପତ୍ତି କାରବାରରେ ଲିପ୍ତ ଥିଲେ । ଅଧିକାରୀଙ୍କ କହିବା ହେଲା, ଲୋକାୟୁକ୍ତଙ୍କ ଯାଞ୍ଚରେ ଭୋପାଳ ସମେତ ଅନେକ ଜିଲ୍ଲାରେ ତାଙ୍କ ସମ୍ପତ୍ତିର ପ୍ରମାଣ ମିଳିଛି ।
ଲୋକାୟୁକ୍ତ ପୋଲିସ ମୁତାବକ, ସୌରଭ ଶର୍ମାଙ୍କୁ ତାଙ୍କ ବାପାଙ୍କ ମୃତ୍ୟୁ ପରେ ୨୦୧୫ରେ ଆରଟିଓରେ ଅନୁକମ୍ପାମୂଳକ ଭାବେ ଚାକିରି ମିଳିଥିଲା ।
