ୱାସିଂଟନ: ୪ ବର୍ଷ ପରେ ହ୍ୱାଇଟ୍ ହାଉସକୁ ଫେରିଥିବା ଆମେରିକାର ୪୭ତମ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋମବାର ଏକ କାର୍ଯ୍ୟନିର୍ବାହୀ ନିର୍ଦ୍ଦେଶନାମାରେ ସ୍ୱାକ୍ଷର କରିଛନ୍ତି। ଆମେରିକାରେ ଅଣନାଗରିକ ପିତାମାତାଙ୍କଠାରୁ ଜନ୍ମିତ ପିଲାମାନଙ୍କର ସ୍ୱୟଂଚାଳିତ ନାଗରିକତାକୁ ବନ୍ଦ କରିବା ପାଇଁ ସେ ଏହି ପଦକ୍ଷେପ ନେଇଛନ୍ତି। ଟ୍ରମ୍ପଙ୍କ ଦ୍ୱାରା ସ୍ୱାକ୍ଷରିତ କାର୍ଯ୍ୟନିର୍ବାହୀ ଆଦେଶରେ କୁହାଯାଇଛି ଯେ ନାଗରିକତା ପାଇବା ପାଇଁ ଆମେରିକାରେ ଜନ୍ମ ଗ୍ରହଣ କରିଥିବା ପିଲାଙ୍କ ପାଇଁ ପିତାମାତାଙ୍କ ମଧ୍ୟରୁ ଅତି କମ୍ରେ ଜଣେ ଆମେରିକୀୟ ନାଗରିକ ହୋଇଥିବେ, ଆଇନଗତ ସ୍ଥାୟୀ ବାସିନ୍ଦା (ଗ୍ରୀନ କାର୍ଡଧାରୀ) ହୋଇଥିବେ କିମ୍ବା ଆମେରିକୀୟ ସେନାର ଜଣେ ସଦସ୍ୟ ହୋଇଥିବା ଆବଶ୍ୟକ। ଆମେ ବେଆଇନ ବିଦେଶୀଙ୍କ ଯାଞ୍ଚ ଓ ସ୍କ୍ରିନିଂକୁ କଡ଼ାକଡ଼ି କରିବାକୁ ଯାଉଛୁ ଏବଂ ଏ ଦିଗରେ ପ୍ରକ୍ରିୟା ଆରମ୍ଭ ହୋଇସାରିଛି ବୋଲି ଟ୍ରମ୍ପ ପ୍ରଶାସନର ଜଣେ ଅଧିକାରୀ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି।
ନାଗରିକତା ପାଇଁ ନୂଆ ସର୍ତ୍ତ ଲାଗୁ ହେବ
ବେଆଇନ ପ୍ରବାସ ରୋକିବାକୁ କଡ଼ା ପଦକ୍ଷେପ
ଭାରତୀୟଙ୍କ ଉପରେ ପ୍ରଭାବ ପକାଇବ
ଆମେରିକାରେ ଦ୍ରୁତ ଗତିରେ ବୃଦ୍ଧି ପାଉଥିବା ପ୍ରବାସୀ ଜନସଂଖ୍ୟା ମଧ୍ୟରୁ ଅନ୍ୟତମ ଭାରତୀୟ-ଆମେରିକୀୟ ସମୁଦାୟ ଏହି ପରିବର୍ତ୍ତନ ଦ୍ୱାରା ଗଭୀର ଭାବେ ପ୍ରଭାବିତ ହେବେ। ୨୦୨୪ ସୁଦ୍ଧା ଭାରତୀୟ ଆମେରିକୀୟଙ୍କ ସଂଖ୍ୟା ୫.୪ ନିୟୁତରୁ ଅଧିକ, ଯାହା କି ଆମେରିକା ଜନସଂଖ୍ୟାର ୧.୪୭ ପ୍ରତିଶତ। ସେମାନଙ୍କ ମଧ୍ୟରୁ ପ୍ରାୟ ଦୁଇତୃତୀୟାଂଶ ପ୍ରବାସୀ ହୋଇଥିବା ବେଳେ ୩୪% ଆମେରିକାରେ ଜନ୍ମିତ। ଟ୍ରମ୍ପଙ୍କ କାର୍ଯ୍ୟନିର୍ବାହୀ ଆଦେଶ ଅନୁଯାୟୀ ନୀତିରେ ପରିବର୍ତ୍ତନ ହେବାପରେ ଅସ୍ଥାୟୀ ୱାର୍କ ଭିସାରେ ଥିବା (ଏଚ୍-୧ବି ଭିସା ଭଳି) କିମ୍ବା ଗ୍ରୀନ୍ କାର୍ଡ ପାଇଁ ଅପେକ୍ଷା କରିଥିବା ଭାରତୀୟ ନାଗରିକଙ୍କଠାରୁ ଜନ୍ମିତ ପିଲାମାନେ ଆପେ ଆପେ ଆମେରିକାର ନାଗରିକତା ହାସଲ କରିପାରିବେ ନାହିଁ। ଏହାଦ୍ୱାରା ପ୍ରତିବର୍ଷ ଆମେରିକାରେ ଭାରତୀୟ ପ୍ରବାସୀଙ୍କଠାରୁ ଜନ୍ମ ହେଉଥିବା ହଜାର ହଜାର ଶିଶୁ ପ୍ରଭାବିତ ହେବେ। ଅଣ-ପ୍ରବାସୀ ଭିସାରେ ଭାରତୀୟ ଛାତ୍ରଛାତ୍ରୀଙ୍କଠାରୁ ଜନ୍ମ ହୋଇଥିବା ପିଲାମାନେ ଆମେରିକାର ନାଗରିକତା ହାସଲ କରିବାରେ ଚ୍ୟାଲେଞ୍ଜର ସମ୍ମୁଖୀନ ହେବେ, ଯାହା ସେମାନଙ୍କ ପରିବାର ପାଇଁ ଆହୁରି ଅନିଶ୍ଚିତତା ବଢ଼ାଇବ।
