[ad_1]
ପନ୍ନା: ମଧ୍ୟପ୍ରଦେଶ ପନ୍ନାର ପୂର୍ବତନ ରାଜ ପରିବାରର ସଦସ୍ୟା ରାଣୀ ଜିତେଶ୍ୱରୀ ଦେବୀଙ୍କୁ ଶୁକ୍ରବାର ଜନ୍ମାଷ୍ଟମୀ ଉତ୍ସବ ସମୟରେ ନିୟମ ଉଲ୍ଲଂଘନ କରି ମନ୍ଦିରର ଗର୍ଭଗୃହରେ ପ୍ରବେଶ କରିବା ଅଭିଯୋଗରେ ଗିରଫ କରାଯାଇଥିଲା। ପ୍ରତିବର୍ଷ ରୀତିନୀତି ଅନୁଯାୟୀ ଜନ୍ମାଷ୍ଟମୀ ଦିନ ମଧ୍ୟରାତ୍ରରେ ପନ୍ନା ଜିଲ୍ଲା ଅନ୍ତର୍ଗତ ବୁନ୍ଦେଲଖଣ୍ଡ ଅଞ୍ଚଳର ଶ୍ରୀଯୁଗଳକିଶୋର ମନ୍ଦିରରେ ଉତ୍ସବ ପାଳନ କରାଯାଇଥାଏ। ମନ୍ଦିର ଅଧିକାରୀଙ୍କ କହିବାନୁସାରେ, ଜିତେଶ୍ୱରୀ ଦେବୀ ନିଜେ ‘ଆରତି’ କରିବାକୁ ଜିଦ୍ ଧରି ମନ୍ଦିରର ରୀତିନୀତିକୁ ଉପେକ୍ଷା କରିଥିଲେ। ପରବର୍ତ୍ତୀ ସମୟରେ ଯେତେବେଳେ ସେ ଗର୍ଭଗୃହରେ ପ୍ରବେଶ କରିବାକୁ ଚେଷ୍ଟା କଲେ, ସେତେବେଳେ ସେ ତଳେ ପଡ଼ିଯାଇଥିଲେ। ତେଣୁ ପୁଲିସକୁ ବାଧ୍ୟ ହୋଇ ମନ୍ଦିରରେ ପହଞ୍ଚି ରାଣୀଙ୍କୁ ମନ୍ଦିର ପରିସରରୁ ବାହାରକୁ ଯିବାକୁ କହିଥିଲା। ଏହି ଘଟଣାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି, ଯେଉଁଥିରେ ରାଣୀ ମନ୍ଦିର କର୍ତ୍ତୃପକ୍ଷ ଓ ପୁଲିସ ସହ ଯୁକ୍ତିତର୍କ କରୁଥିବା ଦେଖାଯାଇଛି। ମନ୍ଦିରରେ ଉପସ୍ଥିତ ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି ଯେ, ଜିତେଶ୍ୱରୀ ଦେବୀ ମଦ୍ୟପାନ କରି ମନ୍ଦିର କର୍ତ୍ତୃପକ୍ଷଙ୍କ ସହ ହାତାହାତି କରିବାକୁ ଚେଷ୍ଟା କରିଥିଲେ। ପୂର୍ବତନ ରାଣୀଙ୍କୁ ପୁଲିସ କର୍ମଚାରୀମାନେ ମନ୍ଦିରରୁ ଟାଣି ବାହାରକୁ ନେଇଯାଇଥିଲେ।
ପାନ୍ନା ପୁଲିସ ଅଧୀକ୍ଷକ ସାଇ କୃଷ୍ଣ ଏସ୍ ଥୋଟା କହିଛନ୍ତି ଯେ, ରୀତିନୀତି ଅନୁଯାୟୀ କେବଳ ରାଜ ପରିବାରର ପୁରୁଷମାନେ ମନ୍ଦିରରେ ଜନ୍ମାଷ୍ଟମୀ ସମୟରେ ଝାଡ଼ୁ ମାରିବାର ପ୍ରଥା ରହିଛି। ଯେହେତୁ ଜିତେଶ୍ୱରୀ ଦେବୀଙ୍କ ପୁଅ ମନ୍ଦିରକୁ ଆସିପାରିନଥିଲେ, ତେଣୁ ସେ ନିଜେ ଏହି ନୀତି ପାଳନ କରିବାକୁ ଅଡ଼ି ବସିଥିଲେ। ତାଙ୍କ ବିରୋଧରେ ଏଫ୍ଆଇଆର୍ ପଞ୍ଜୀକୃତ ହୋଇଥିଲା ଏବଂ ତାଙ୍କୁ ମଧ୍ୟପ୍ରଦେଶ ପୁଲିସ ଗିରଫ କରି ପରେ ଛାଡ଼ି ଦେଇଥିଲା। ପୁଲିସ ତାଙ୍କୁ ନେଇଯିବାବେଳେ ଜିତେଶ୍ୱରୀ ଦେବୀ ମଧ୍ୟପ୍ରଦେଶ ସରକାରଙ୍କ ବିରୋଧରେ ଏକ ଗୁରୁତର ଅଭିଯୋଗ ଆଣିଛନ୍ତି। ସେ ଅଭିଯୋଗ କରିଛନ୍ତି ଯେ, ପ୍ରତିରକ୍ଷା କଲ୍ୟାଣ ପାଣ୍ଠିରୁ ପାନ୍ନାରେ ୬୫,୦୦୦ କୋଟି ଟଙ୍କା ହଡ଼ପ କରାଯାଇଛି। ଏହି ଦୁର୍ନୀତି ନେଇ ସ୍ୱର ଉତ୍ତୋଳନ କରିବାରୁ ତାଙ୍କୁ ଗିରଫ କରାଯାଇଥିବା ସେ ଦାବି କରିଛନ୍ତି।
[ad_2]
