[ad_1]
ନୂଆଦିଲ୍ଲୀ: ଗୁରୁବାର (ନଭେମ୍ବର ୩୦) ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ପାଇଁ ଖେଳାଳିଙ୍କ ନାମ ପଞ୍ଜୀକରଣର ଶେଷ ଦିନ । ଖେଳାଳିମାନେ ନିଜ ନିଜ ବୋର୍ଡ ଜରିଆରେ ନୋ ଅବଜେକ୍ସନ୍ ସାର୍ଟିଫିକେଟ୍(ଏନ୍ଓସି) ସହ ନାମ ଦାଖଲ କରିବାକୁ ପଡ଼ିବ । ଆସନ୍ତା ୧୯ ତାରିଖରେ ଏହି ନିଲାମ ହେବ । ନିଲାମ ପାଇଁ ୭୦୦ରୁ ଅଧିକ ଖେଳାଳି ପଞ୍ଜିକରଣ କରିବେ ବୋଲି ଆଶା କରାଯାଉଥିବା ବେଳେ ଏଥର କିଛି ପ୍ରମୁଖ ଖେଳାଳିଙ୍କ ନାମ ଏହି ତାଲିକାରେ ରହିବ । ପ୍ୟାଟ୍ କମିନ୍ସ, ମିଚେଲ ଷ୍ଟାର୍କ, ଟ୍ରାଭିସ୍ ହେଡ୍, ଡାରିଲ୍ ମିଚେଲ୍, ରଚିନ ରବୀନ୍ଦ୍ର, ଇବ୍ରାହିମ୍ ଜାଦ୍ରାନ୍, ରହମତ୍ ଶାହଙ୍କ ଭଳି ବିଶ୍ୱକପ୍ ଉଲ୍ଲେଖନୀୟ ପ୍ରଦର୍ଶନକାରୀ ଖେଳାଳିଙ୍କ ଉପରେ ସମସ୍ତଙ୍କ ନଜର ରହିବ ।
ବିଶେଷ କରି ଷ୍ଟାର୍କ ପୂର୍ବ ନିଲାମରେ କିଣିବା ପରେ ନିଜକୁ ଅନୁପଲବ୍ଧ କରାଇବାର ଇତିହାସ ଥିବା ସତ୍ତ୍ୱେ ଫ୍ରାଞ୍ଚାଇଜ୍ ତାଙ୍କୁ କଡ଼ା ଟକ୍କର ଦେବେ ବୋଲି ଆଶା କରାଯାଉଛି । କ୍ରିକେଟ୍ ଅଷ୍ଟ୍ରେଲିଆର ନିକଟତର ସୂତ୍ରରୁ ପ୍ରକାଶ ଯେ ଅତିକମରେ ପାଞ୍ଚଟି ଫ୍ରାଞ୍ଚାଇଜ୍ ଏହି ବାମହାତୀ ଖେଳାଳିଙ୍କ ନିକଟରେ ପହଞ୍ଚିଛନ୍ତି ଏବଂ ସେ ମାର୍କି ତାଲିକାରେ ସ୍ଥାନ ପାଇବାର ସମ୍ଭାବନା ରହିଛି । ପଞ୍ଜିକରଣ ପରେ ଫ୍ରାଞ୍ଚାଇଜମାନଙ୍କୁ ଏହି ତାଲିକାକୁ କାଟିବା ପାଇଁ ଦାୟିତ୍ୱ ଦିଆଯିବ । ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପ୍ରାୟ ୭୦ ଜଣ ଖେଳାଳିଙ୍କୁ ନିଲାମୀରେ ବିକ୍ରି କରିବ ବୋଲି ଆଶା ରଖିଛି । ବିସିସିଆଇ ସ୍ପଷ୍ଟ କରିଛି ଯେ ନିଲାମୀରେ ମୋଟ ୨୬୨.୯୫ କୋଟି ଟଙ୍କାର କାରବାର ହୋଇପାରିବ ଏବଂ ୧୦ଟି ଦଳରେ ୭୭ଟି ସ୍ଥାନ ଉପଲବ୍ଧ ରହିଛି ।
ଏଥିସହିତ ଦଳଗୁଡ଼ିକ ୩୦ ଜଣ ବିଦେଶୀ ଖେଳାଳିଙ୍କୁ କିଣିପାରିବେ । ବେନ୍ ଷ୍ଟୋକ୍ସ ପୂର୍ବରୁ ପ୍ରତ୍ୟାହାର କରିସାରିଥିବା ବେଳେ ଫ୍ରାଞ୍ଚାଇଜ୍ ସୂତ୍ରରୁ ଜଣାଯାଇଛି ଯେ, ମୁମ୍ବାଇ ଇଣ୍ଡିଆନ୍ସ ପକ୍ଷରୁ ନିକଟରେ ରିଲିଜ୍ ହୋଇଥିବା ଜୋଫ୍ରା ଆର୍ଚରଙ୍କ ଉପଲବ୍ଧତାକୁ ନେଇ ନିଶ୍ଚିତତା ଅପେକ୍ଷା କରାଯାଇଛି । ନିକଟରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପକ୍ଷରୁ ରିଲିଜ୍ ହୋଇଥିବା ଜୋଶ୍ ହାଜେଲଉଡ୍ ଏହି ଲିଗ୍ ପାଇଁ ଉପଲବ୍ଧ ହୋଇପାରନ୍ତି ବୋଲି ମଧ୍ୟ ଚର୍ଚ୍ଚା ହେଉଛି । ଭାରତ-ଇଂଲଣ୍ଡ ମଧ୍ୟରେ ପାଞ୍ଚଟି ଟେଷ୍ଟ ମ୍ୟାଚ୍ ବିଶିଷ୍ଟ ଶୃଙ୍ଖଳା ଶେଷ ହେବା ପରେ ମାର୍ଚ୍ଚ ତୃତୀୟ ସପ୍ତାହରୁ ମେ’ ତୃତୀୟ ସପ୍ତାହ ପର୍ଯ୍ୟନ୍ତ ଆଇପିଏଲ୍ ଖେଳାଯିବାର ସମ୍ଭାବନା ରହିଛି ।
[ad_2]
