[ad_1]
ନୂଆଦିଲ୍ଲୀ: ମୋଦୀ ସରକାର ବିରୋଧରେ ଇଣ୍ଡିଆ ମେଣ୍ଟର ସାଂସଦମାନେ ଆଣିଥିବା ଅନାସ୍ଥା ପ୍ରସ୍ତାବ ଉପରେ ଆଜି ଲୋକସଭାରେ ଆଲୋଚନା ଆରମ୍ଭ ହେବ। ଆଜି ମଧ୍ୟାହ୍ନ ୧୨ଟାରୁ ସଂଧ୍ୟା ୭ଟା ଯାଏ ଅନାସ୍ଥା ପ୍ରସ୍ତାବ ଉପରେ ଆଲୋଚନା ହେବ ବୋଲି ସୂଚନା ରହିଛି। ଏହି ଅବସରରେ କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କୁ ନେଇ ବି ଅଲୋଚନା ହୋଇପାରେ। ଅଗଷ୍ଟ ୧୦ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅନାସ୍ଥା ପ୍ରସ୍ତାବ ଉପରେ ତାଙ୍କର ମତ ରଖିବେ।
ତେବେ ପୁଣି ଥରେ ସାଂସଦ ପଦ ଫେରି ପାଇଥିବା କଂଗ୍ରେସ ନେତା ରାହୁଲ ଗାନ୍ଧୀ ସଂସଦରେ ତାଙ୍କ ‘ତୁଗଲାକ୍ ଲେନ୍’ ଘରକୁ ଫେରିପାଇବାକୁ ଆବେଦନ କରିବେ। ରାହୁଲଙ୍କ ସରକାରୀ ବାସଭବନରେ ଏପର୍ଯ୍ୟନ୍ତ କେହି ରହିନାହାନ୍ତି।
ସୂତ୍ରରୁ ପ୍ରକାଶ ଯେ ରାହୁଲ ଗାନ୍ଧୀ ପୁଣି ଥରେ ଆବେଦନ କରିବା ପରେ ତାଙ୍କୁ ତାଙ୍କ ଘର ଫେରସ୍ତ ମିଳିବ। ମୋଦୀ ସାଙ୍ଗିଆକୁ ନେଇ ବିବାଦୀୟ ବୟାନ ଦେଇ ରାହୁଲ ଜେଲ୍ ଯିବା ପରେ ମାର୍ଚ ୨୪ ତାରିଖରେ ତାଙ୍କ ଘର ଛାଡ଼ିଥିଲେ। ସେବେଠାରୁ ସେ ତାଙ୍କ ମା ସୋନିଆ ଗାନ୍ଧୀଙ୍କ ୧୦ ଜନପଥ ରୋଡ୍ ବାସଭବନରେ ରହୁଥିଲେ।
ଏହାପୂର୍ବରୁ ସୋମବାର ଦିନ ବରିଷ୍ଠ କଂଗ୍ରେସ ନେତା ଅଧୀର ରଂଜନ ଚୌଧୁରୀ ଲୋକସଭା ଗୃହ କମିଟି ସମ୍ମୁଖରେ ରାହୁଲ ଗାନ୍ଧୀଙ୍କ ଘର ପ୍ରସଙ୍ଗ ଉଠାଇଥିଲେ। ସେ ଗାନ୍ଧୀଙ୍କ ତରଫରୁ ଆବେଦନ କରିବାକୁ ଚାହୁଁଥିଲେ। କିନ୍ତୁ ନିୟମ ଅନୁଯାୟୀ କେବଳ ଗାନ୍ଧୀ ହିଁ ଏହି ଆବେଦନ କରିପାରିବେ।
ଲୋକସଭା ଗୃହ କମିଟି ଗାନ୍ଧୀଙ୍କୁ ସରକାରୀ ବାସଭବନରୁ ବାହାରକୁ ଯିବାକୁ କହିବା ପରେ କଂଗ୍ରେସ କେନ୍ଦ୍ର ବିରୋଧରେ ରାଜନୈତିକ ପ୍ରତିଶୋଧ ନେଇଥିବା ଅଭିଯୋଗ ଆଣିଥିଲା। ତାପରେ ‘ମେରା ଘର ଆପ୍କା ଘର’ ଅଭିଯାନ ଆରମ୍ଭ ହେବା ପରେ ରାହୁଲ ଗାନ୍ଧୀଙ୍କୁ ବିଭିନ୍ନ ବରିଷ୍ଠ କଂଗ୍ରେସ ନେତା ସେମାନଙ୍କ ଘରେ ରହିବା ପାଇଁ ଅଫର୍ ଦେଇଥିଲେ।
ପ୍ରଥମେ ଉତ୍ତରପ୍ରଦେଶର ବରିଷ୍ଠ ନେତା ଅଜୟ ରାୟ ନିଜ ଘରକୁ ଗାନ୍ଧୀଙ୍କ ଉଦ୍ଦେଶ୍ୟରେ ଉତ୍ସର୍ଗ କରିବା ପରେ ଏହି ଅଭିଯାନ ଆରମ୍ଭ ହୋଇଥିଲା। ଅଜୟ ରାୟ କହିଥିଲେ, ‘ଦେଶର ଏକଛତ୍ରବାଦୀ ଶାସକମାନେ ଆମ ନେତା ରାହୁଲ ଗାନ୍ଧୀଙ୍କ ବାସଭବନକୁ ଛଡ଼େଇ ନେବାକୁ ଚାହାଁନ୍ତି। କିନ୍ତୁ ସେମାନେ ଜାଣନ୍ତି ନାହିଁ ଯେ ସାରା ଦେଶରେ କୋଟି କୋଟି ଦଳର କର୍ମୀ ରାହୁଲ ଗାନ୍ଧୀଙ୍କର ଅଟନ୍ତି।’
[ad_2]
