କୋଲକାତାରେ ‘ନବାନ୍ନ ଅଭିଯାନ’: ପୁଲିସ ବ୍ୟାରିକେଡ୍ ଉପରକୁ ଚଢ଼ି ବିକ୍ଷୋଭ ପ୍ରଦର୍ଶନ, ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ପଶିବାକୁ ଉଦ୍ୟମ

ହାୱଡା ନିକଟରେ ଆନ୍ଦୋଳନକାରୀଙ୍କ ସହ ପୁଲିସର ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଛି। ବ୍ୟାରିକେଡ୍‌ ଭାଙ୍ଗି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ପଶିବାକୁ ଉଦ୍ୟମ କରିଛନ୍ତି ଆନ୍ଦୋଳନକାରୀ। ବିକ୍ଷୋଭକାରୀମାନେ ପୁଲିସ୍ ବ୍ୟାରିକେଡ୍ ଉପରକୁ ଚଢ଼ି ବିକ୍ଷୋଭ ପ୍ରଦର୍ଶନ କରିଛନ୍ତି। ସେପଟେ ଏହାକୁ ଦୃଢ ସମର୍ଥନ ଜଣାଇଛି ବିଜେପି । ବିକ୍ଷୋଭରତ ଜୁନିୟର ଡାକ୍ତର ସଂଘ ଏଥିରେ ଯୋଗ ଦେବେ ନାହିଁ ବୋଲି ମତ ରଖିଛନ୍ତି । ତେବେ ମୁଖ୍ୟମନ୍ତ୍ରୀ ମମତା ବାନାର୍ଜିଙ୍କ ଇସ୍ତଫା ଦାବିରେ ଛାତ୍ର ସଂଗଠନ ଏହି ଡାକରା ଦେଇଛି।

କୋଲକାତା ଲଜ୍ଜାକୁ ସରକାର ଯେଉଁଭଳି ଭାବେ ପରିଚାଳନା କରିଛନ୍ତି ତାହାକୁ ଦୃଢ ବିରୋଧ କରି ରବିନ୍ଦ୍ରଭାରତୀ ବିଶ୍ବବିଦ୍ୟାଳୟର ଏମଏ ଛାତ୍ର ପ୍ରବୀର ଦାସ ଓ କଲ୍ୟାଣୀ ବିଶ୍ବବିଦ୍ୟାଳୟର ଶୁଭଙ୍କର ହଳଧର ଏବଂ ଶହାନ ଲହିଡୀ ଏହି ବିକ୍ଷୋଭର ନେତୃତ୍ବ ନେବେ ବୋଲି ଘୋଷଣା କରିଛନ୍ତି । ଏଥିସହିତ ସେମାନେ ଏହା ବି କହିଛନ୍ତି ଯେ, ଆମର ତିନୋଟି ଦାବି ରହିଛି । ଅଭୟାଙ୍କୁ ନ୍ୟାୟ, ଅପରାଧୀକୁ ମୃତ୍ୟୁ ଦଣ୍ଡ ଏବଂ ମୁଖ୍ୟମନ୍ତ୍ରୀ ମମତା ବାନାର୍ଜିଙ୍କ ଇସ୍ତଫା ।

ଅନ୍ୟପକ୍ଷରେ ଶାସକ ତୃଣମୂଳ କଂଗ୍ରେସ ଏହାକୁ ବେଆଇନ ଏବଂ ବିଜେପି, ଆରଏସଏସ ଓ ସିପିଏମର ଚାଲ ବୋଲି ଦର୍ଶାଇଛି । ବିରୋଧୀ ରାଜ୍ୟରେ ଅଶାନ୍ତି ଖେଳାଇବା ପାଇଁ ଏପରି ଷଡଯନ୍ତ୍ର ରଚିଛି ବୋଲି କହିଛି ଟିଏମସି । ଅନ୍ୟପକ୍ଷରେ ଛାତ୍ରଙ୍କ ‘ନବନ୍ନା ଅଭିଯାନ’କୁ ଦୃଷ୍ଟିରେ ରଖି ସହରରେ ୬ ହଜାର ପୋଲିସ ନିୟୋଜିତ କରାଯାଇଛି । ପୂରା ୧୯ଟି ସ୍ଥାନରେ ବ୍ୟାରିକେଡ ବ୍ୟବସ୍ଥା କରାଯାଇଛି । ଏଥିସହିତ ଗୁରୁତ୍ବପୂର୍ଣ୍ଣ ଜାଗାମାନଙ୍କରେ ଲୁହାର ବ୍ୟାରିକେଡ ଲଗାଯାଇଛି । ରାଜ୍ୟ ସଚିବାଳୟ ‘ନବାନ୍ନ ଭବନ’କୁ ବାହାରେ କୋଲକାତା ପୁଲିସ ଓ ହାଓ୍ବଡା ପୋଲିସଙ୍କ ତିନି ସ୍ତରୀୟ ସୁରକ୍ଷା ବ୍ୟବସ୍ଥା ଘେରି ରହିଛି । ପୋଲିସ୍ ଅଧିକାରୀମାନଙ୍କୁ ଅଧିକ ସତର୍କ ରହିବା ପାଇଁ ନିର୍ଦ୍ଦେଶ ଦିଆଯିବା ସହିତ ସିସିଟିଭି ସୁରକ୍ଷା ଓ ଓ୍ବାଟର କାନନ ମଧ୍ୟ ପ୍ରସ୍ତୁତ ହୋଇ ରହିଛି ।