ରେଙ୍ଗାଲିକ୍ୟାମ୍ପ : ବରଗଡ଼ ଜିଲ୍ଲା ଅତାବିରା ବ୍ଲକ୍ ଲରମ୍ଭା ଗ୍ରାମର ହରିଜନ ପଡ଼ାରେ ରହୁଥିବା ଚତୁର୍ଭୁଜ ନନ୍ଦଙ୍କ ଝିଅ ଆରତୀ ନନ୍ଦଙ୍କ ସାପ ଦଂଶନରେ ମୃତ୍ୟୁ ହୋଇଛି। ରାତିରେ ଶୋଇଥିବା ବେଳେ ରାତି ପ୍ରାୟ ୧ ରୁ ୨ ଟା ଭିତରେ ତାଙ୍କୁ ଏକ ଚିତି ସାପ କାମୁଡି ଦେଇଥିଲା। ଫଳରେ ସେ ଉଠିପଡ଼ି ସାପକୁ ଦେଖି ପରିବାର ବର୍ଗଙ୍କୁ କହିଥିଲେ।
ସାପକୁ ମାରି ଦିଆଯାଇଥିଲା। ଆରତୀକୁ ସଙ୍ଗେ ସଙ୍ଗେ ବୁର୍ଲା ଡାକ୍ତର ଖାନାକୁ ନେଇଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା । ଏନେଇ ବୁର୍ଲା ଫାଣ୍ଡି ଅଧିକାରୀ ମୃତଦେହକୁ ବ୍ୟବଚ୍ଛେଦ ପାଇଁ ପଠେଇଥିଲେ । ବ୍ୟବଚ୍ଛେଦ ପରେ ମୃତ ଶରୀରରକୁ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଥିଲା। ଆରତୀ ସପ୍ତମ ଶ୍ରେଣୀରେ ପଢ଼ୁଥିଲେ। ବୟସ ୧୨ ବର୍ଷ। ଆରତୀଙ୍କ ଏହି ଆକସ୍ମିକ ମୃତ୍ୟୁରେ ବାପା ମାଆ ତଥା ପରିବାର ବର୍ଗ ଭାଙ୍ଗି ପଡିଛନ୍ତି।
