ଗିରଫ ହେଲେ ଅଲୁ ଅର୍ଜୁନ, ‘ପୁଷ୍ପା ୨’ ସ୍କ୍ରିନିଂ ବେଳେ ଦଳାଚକଟାରେ ଚାଲିଯାଇଥିଲା ମହିଳାଙ୍କ ପ୍ରାଣ

ଗିରଫ ହେଲେ ‘ପୁଷ୍ପା ୨’ର ଅଭିନେତା ଅଲୁ ଅର୍ଜୁନ । ହାଇଦ୍ରାବାଦ ପାଲିସ ତାଙ୍କୁ ଗିରଫ କରିଛି । ପୂର୍ବରୁ ତାଙ୍କ ବିରୋଧରେ ବିଏନଏସର ଧାରା ୧୦୫ ଓ ୧୧୮ରେ ପୋଲିସ ମାମଲା ରୁଜୁ କରିଥିଲା । ହାଇଦ୍ରାବାଦରେ ‘ପୁଷ୍ପା ୨’ର ପ୍ରିମିୟର ଶୋ’ ବେଳେ ଏକ ସିନେମା ହଲରେ ଦଳାଚକଟା ହୋଇଥିଲା । ଏହି ଦଳାଚକଟାରେ ଜଣେ ମହିଳାଙ୍କ ମୃତ୍ୟୁ ହୋଇଥିବା ବେଳେ ବହୁ ଦର୍ଶକ ଆହତ ହୋଇଥିଲେ । ତେବେ ଅଲୁ ଅର୍ଜୁନ ପୂର୍ବ ସୂଚନା ନ ଦେଇ ହଲରେ ପହଞ୍ଚିଯିବାରୁ ଏଭଳି ଦଳାଚକଟା ହୋଇଥିବା ହାଇଦ୍ରାବାଦ ପୋଲିସ ପକ୍ଷରୁ କୁହାଯାଇଛି ।

ଫିଲ୍ମ ‘ପୁଷ୍ପା ୨’ ସାରା ବିଶ୍ୱରେ ଧମାଲ୍ କରୁଥିବା ବେଳେ ଏପଟେ ଅଲୁ ଅର୍ଜୁନଙ୍କୁ ଗିରଫ କରିଛି ପୋଲିସ । ହାଇଦ୍ରାବାଦର ଏକ ଥିଏଟରରେ ମହିଳାଙ୍କ ମୃତ୍ୟୁ ମାମଲାରେ ଅଭିନେତାଙ୍କୁ ଗିରଫ କରାଯାଇଛି । ଡିସେମ୍ବର ୪ରେ ଫିଲ୍ମର ସ୍କ୍ରିନିଂ ବେଳେ ଏଠାରେ ଦଳାଚକଟାରେ ଜଣେ ୩୫ ବର୍ଷୀୟା ମହିଳାଙ୍କ ମୃତ୍ୟୁ ହୋଇଥିଲା । ଏହି ଘଟଣାରେ ପୋଲିସ ଅଲୁ ଅର୍ଜୁନ ଓ ଥିଏଟର କର୍ତ୍ତୃପକ୍ଷଙ୍କ ବିରୋଧରେ ମାମଲା ରୁଜୁ କରିଥିଲା ।

ପୋଲିସ ମୁତାବକ, ‘ପୁଷ୍ପା ୨’ର ପେଡ୍ ପ୍ରିଭ୍ୟୁ ସମୟରେ ଅଲୁ ଅର୍ଜୁନ ଥିଏଟରରେ ଅଚାନକ୍ ପହଞ୍ଚିଥିଲେ । ଏଠାରେ ଅଭିନେତାଙ୍କୁ ଦେଖି ଫ୍ୟାନମାନେ ବେକାବୁ ହୋଇପଡ଼ିବାରୁ ଘଟଣାସ୍ଥଳରେ ଦଳାଚକଟା ହୋଇଥିଲା । ଫିଲ୍ମ ଦେଖିବାକୁ ଆସିଥିବା ଜଣେ ମହିଳାଙ୍କର ଏଥିରେ ମୃତ୍ୟୁ ଘଟିଥିଲା । ମହିଳା ଜଣକ ନିଜ ପିଲା ଏବଂ ସ୍ୱାମୀଙ୍କ ସହ ଫିଲ୍ମ ଦେଖିବାକୁ ଆସିଥିଲେ ।