[ad_1]
ଭୁବନେଶ୍ୱର: ରାଜ୍ୟରେ ଶିଳ୍ପବିକାଶ ଏବଂ ନିଯୁକ୍ତି ସହ ଜଡ଼଼ିତ ବିଭିନ୍ନ ଜନ ଅଭିଯୋଗ ସମ୍ପର୍କରେ ମଙ୍ଗଳବାର ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସରକାର ନିଯୁକ୍ତିଭିତ୍ତିକ ଶିଳ୍ପକୁ ଉତ୍ସାହିତ କରିବା ପାଇଁ ଶିଳ୍ପଲାଗି ଅବ୍ୟବହୃତ ଜମିକୁ ‘ପୁନର୍ବିକାଶ’ କରିବା ପାଇଁ ଯୋଜନା କରୁଛନ୍ତି । ବିଶେଷକରି ଓରିଏଣ୍ଟ କାଗଜକଳ ଓ ଓଟିଏମ୍ ଜମିକୁ ଏଥିପାଇଁ ବ୍ୟବହାର କରାଯିବ । ଚୌଦ୍ୱାରରେ ଥିବା ଓଟିଏମ୍ ଜମିରେ ବୟନଶିଳ୍ପ ଏବଂ ଲୋକୋମୋଟିଭ୍ ଶିଳ୍ପ ପ୍ରତିଷ୍ଠା କରାଯିବ । ସେହିପରି ଗୋପାଳପୁର ଇଣ୍ଡଷ୍ଟ୍ରିଆଲ୍ ପାର୍କ, ବରପାଲି ଏବଂ ହିଞ୍ଜିଳି ଏମ୍ଏସ୍ଏମ୍ଇ ପାର୍କ କାର୍ଯ୍ୟ ତ୍ୱରାନ୍ୱିତ ହେବ । ଶିଳ୍ପ ପ୍ରୋତ୍ସାହନ କ୍ଷେତ୍ରରେ ସ୍ଥାନୀୟ ଯୁବକ ଯୁବତୀଙ୍କ ଦକ୍ଷତାକୁ ଆଧାର କରି ନିଯୁକ୍ତି ପ୍ରଦାନ କରାଯିବ ଏବଂ ଶିଳ୍ପାନୁଷ୍ଠାନଗୁଡ଼ିକରେ ଉତ୍ପାଦନ ଆଧାରିତ ନିଯୁକ୍ତିପାଇଁ ‘ନବୀକରଣ’ କରାଯିବ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଉଚ୍ଚସ୍ତରୀୟ ବୈଠକରେ ଗୁରୁତ୍ୱପୂର୍ଣ୍ଣ ଶିଳ୍ପ ଏବଂ ଭିତ୍ତିଭୂମି ପ୍ରକଳ୍ପର ସମୀକ୍ଷା କରାଯାଇଛି । ଜନସାଧାରଣଙ୍କ ଆଗ୍ରହକୁ ଦୃଷ୍ଟିରେ ରଖି ନିଯୁକ୍ତିଭିତ୍ତିକ ପ୍ରକଳ୍ପ ପାଇଁ ଖାଲି ଜମିକୁ ବ୍ୟବହାର କରିବା ପାଇଁ ବୈଠକରେ ନିଷ୍ପତ୍ତି ନିଆଯାଇଛି । ଇଡ୍କୋକୁ ଏକମାସ ମଧ୍ୟରେ ଏହିସବୁ ଜମିଜମାର ସ୍ଥିତି ଏବଂ ସମ୍ଭାବ୍ୟ ଶିଳ୍ପ ସମ୍ପର୍କରେ ରିପୋର୍ଟ ଦେବାକୁ କୁହାଯାଇଛି ।
ଗୋପାଳପୁର ଇଣ୍ଡଷ୍ଟ୍ରିଆଲ୍ ପାର୍କରେ ତିନୋଟି ବଡ଼ ବଡ଼ କମ୍ପାନୀ ଜମି ଅଧିଗ୍ରହଣ କରିଥିବାବେଳେ ସେମାନଙ୍କର ପ୍ରକଳ୍ପ ତୁରନ୍ତ ଆରମ୍ଭ କରିବା ପାଇଁ ପରାମର୍ଶ ଦେବାକୁ ଗଞ୍ଜାମ ପ୍ରଶାସନ ଓ ଇଡ୍କୋକୁ ନିର୍ଦ୍ଦେଶ ଦିଆଯାଇଛି । ସେହିପରି ଚୌଦ୍ୱାରରେ ଥିବା ଓଟିଏମ୍ର ୫୨୧ ଏକର ଜମିରେ ବୟନଶିଳ୍ପ ପାର୍କ ଓ ଲୋକୋମୋଟିଭ୍ ଶିଳ୍ପ ପ୍ରତିଷ୍ଠା କରିବା ପାଇଁ ଆଗ୍ରହ ପ୍ରକାଶ ପାଇଥିବା ବୈଠକରୁ ଜଣାପଡ଼ିଛି । ଅନ୍ୟପକ୍ଷରେ ଏଣିକି ଆପିକଲ୍ ଶିଳ୍ପ କ୍ଷେତ୍ରରେ ନିବେଶକମାନଙ୍କୁ ଇଣ୍ଡଷ୍ଟ୍ରିଆଲ୍ ପ୍ଲଟ୍ ପ୍ରଦାନ କରିବ ବୋଲି ବୈଠକରେ ସ୍ଥିର କରାଯାଇଛି । ସ୍ଥାନୀୟ ଯୁବକମାନଙ୍କୁ ସର୍ବାଧିକ ନିଯୁକ୍ତି ସୁଯୋଗ ପ୍ରଦାନ କରିବା ଭଳି ଇଣ୍ଡଷ୍ଟ୍ରିଆଲ୍ ପାର୍କ ପର୍ଯ୍ୟାୟକ୍ରମେ ବିକଶିତ କରିବାକୁ ନିଷ୍ପତ୍ତି ନିଆଯାଇଛି । ବିଭିନ୍ନ ଶିଳ୍ପ ପ୍ରକଳ୍ପ ପାଇଁ ଆବଶ୍ୟକହେଉଥିବା କୁଶଳୀ ମାନବ ସମ୍ବଳ ଯୋଗାଇ ଦେବା ପାଇଁ ଆଇଟିଆଇ ଓ ପଲି-ଟେକ୍ନିକ୍ଗୁଡ଼ିକୁ ଶିଳ୍ପସଂସ୍ଥା ସହ ଯୋଡ଼ିବାକୁ ଫାଇଭ୍-ଟି ସଚିବ ଭି.କେ ପାଣ୍ଡିଆନ୍ ପରାମର୍ଶ ଦେଇଛନ୍ତି । ଉନ୍ନୟନ କମିଶନର ଅନୁ ଗର୍ଗ, ରାଜସ୍ୱ ଓ ବିପର୍ଯ୍ୟୟ ବିଭାଗ ଅତିିରିକ୍ତ ମୁଖ୍ୟ ସଚିବ ସତ୍ୟବ୍ରତ ସାହୁ, ଶିଳ୍ପବିଭାଗ ପ୍ରମୁଖ ସଚିବ ହେମନ୍ତ ଶର୍ମା, ଇଡ୍କୋର ପରିଚାଳନା ନିର୍ଦ୍ଦେଶକଙ୍କ ସମେତ ଗଞ୍ଜାମ, କଟକ ଓ ଝାରସୁଗୁଡ଼ା ଜିଲ୍ଲାପାଳ ପ୍ରମୁଖ ବୈଠକରେ ଉପସ୍ଥିତ ଥିଲେ ।
[ad_2]
