ବ୍ରହ୍ମପୁର: ବିଧାୟକଙ୍କ ନିଆରା ପୂଜାର୍ଚ୍ଚନା । ଯେତିକି ଭୋଟରେ ବିଜୟୀ ହୋଇଥିଲେ , ସେତିକି ସଂଖ୍ୟକ ନଡିଆ ଭାଙ୍ଗି ଠାକୁରଙ୍କ ନିକଟରେ କରିଲେ ପୂଜା ପାଠ । ଗଞ୍ଜାମ ଜିଲ୍ଲା ପାତ୍ରପୁରସ୍ଥିତ ମା’ କୁଠାରୀଙ୍କ ପୀଠରେ ଚିକିଟି ବିଧାୟକ ମନୋରଞ୍ଜନ ଦ୍ୟାନ ସାମାନ୍ତରାଏଙ୍କ ବିଜୟ ପାଇଁ ଜଣେ ସମର୍ଥକ ମାନସିକ ରଖିଥିଲେ । ତେବେ ମନୋରଞ୍ଜନ ବିଜେଡି ପ୍ରାର୍ଥୀଙ୍କୁ ୬,୫୨୨ ଖଣ୍ଡ ଭୋଟରେ ପରାସ୍ତ କରିଥିଲେ ।
ମାନସିକ ପୂରଣ ହୋଇଥିବାରୁ ସେହି ଅନୁଯାୟୀ ମଙ୍ଗଳବାର ମା’ କୁଠାରୀଙ୍କ ନିକଟରେ ୬୫୨୨ଟି ନଡ଼ିଆ ଭଙ୍ଗାଯାଇଛି । ପରେ ଅଞ୍ଚଳର ବହୁ ଯୁବକ ମିଶି ସମସ୍ତ ନଡ଼ିଆ ଭାଙ୍ଗିଥିଲେ ।
ଦୀର୍ଘ ୨୪ ବର୍ଷ ପରେ ଚିକିଟି ନିର୍ବାଚନ ମଣ୍ଡଳୀରେ ପଟ ପରିବର୍ତ୍ତନ ହୋଉଛି । ବିପକ୍ଷ ଦଳୀୟ ପ୍ରାର୍ଥୀଙ୍କ ବିଜୟ ଧାରାରେ ରୋକ ଲଗାଇ ବିଜେପି ପ୍ରାର୍ଥୀ ମନୋରଞ୍ଜନ ଦ୍ୟାନ ସାମନ୍ତରାଏ ବିଜୟୀ ହେବାରେ ସକ୍ଷମ ହୋଇଛନ୍ତି । ସେଠାରେ ବିଧାୟକଙ୍କ ସ୍ତ୍ରୀ ମୀନା ଦ୍ୟାନ ସାମନ୍ତରା, ପାତ୍ରପୁର ବ୍ଲକ ଉପାଧ୍ୟକ୍ଷ ଅନାଦି ଚରଣ ପଣ୍ଡିତ, ଯୁବନେତା କାଳିଦାସ ରେଡ୍ଡୀ, ନାରୀନେତ୍ରୀ ଲଳିତା ପ୍ରଧାନ, ବାଦଲ ପ୍ରଧାନ, କିରଣ ଅଧିକାରୀ, ଅଲେଖ କନ୍ୟାରୀ ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ
