ଏବେ ବି ଏହି ସ୍ଥାନରେ ବଞ୍ଚିରହିଛି ଅତୀତର ପାରମ୍ପରିକ ଖେଳ, କୁନି କୁନି ପିଲାଙ୍କ ଶବ୍ଦରେ କମ୍ପୁଛି ଗାଁ ଦାଣ୍ଡ

ଏବେ କିନ୍ତୁ ଏସବୁ ଖୁବ୍ କମ୍ ସ୍ଥାନରେ ଦେଖିବାକୁ ମିଳୁଛି । ପରିର୍ବତ୍ତନଶୀଳ ସମୟ ଅନୁଯାୟୀ ଖେଳ ଓ ମାନସିକତା ବଦଳିଛି ।

ପୂର୍ବରୁ ଧୂଳି-ଧୂସର ହୋଇ କୁନି କୁନି ପିଲାମାନେ ଗାଁ ଦାଣ୍ଡରେ ଖେଳୁଥିଲେ । ଅଧିକାଂଶ ଖେଳରେ ଗ୍ରାମାଞ୍ଚଳର ଲୋକ-ଗୀତ ଯୋଡ଼ି ହେଉଥିଲା । ଯାହା ଦ୍ୱାରା ଏସବୁ ଖେଳ ପ୍ରତି ପିଲାମାନେ ଅଧିକ ଆଗ୍ରହୀ ହେଉଥିଲେ । ପିଲାଙ୍କ ଉଭୟ ଶାରୀରିକ ଓ ମାନସିକ ଦକ୍ଷତା ବଢ଼ାଇବାରେ ପ୍ରମୁଖ ଭୂମିକା ତୁଲାଉଥିଲା ଅତୀତର ଏହି ସବୁ ଖେଳ । ପୁଅ ଓ ଝିଅଙ୍କ ଖେଳ ଥିଲା ଭିନ୍ନ ଭିନ୍ନ । ଖେଳ ଦ୍ୱାରା ଆମ ଗ୍ରାମୀଣ ପରମ୍ପରାକୁ ଜାଣିବା ସହ ପିଲାଙ୍କ ଭିତରେ ଏକତା ଭାବ ସୃଷ୍ଟି ହେଉଥିଲା । ବର୍ତମାନ ହେଉଛି ସୋସିଆଲ ମିଡିଆ ଯୁଗ । ପିଲାଙ୍କ ଖେଳ ଓ ଖେଳର ତରିକା ବଦଳିଛି । ଅତୀତର ଖେଳ ସବୁ ଇତିହାସ ପାଲଟିବାକୁ ଯାଉଛି ।

କିନ୍ତୁ ଏବେ ବି ଏମିତି ଏକ ସ୍ଥାନ ରହିଛି ଯେଉଁଠାରେ ବଞ୍ଚିରହିଛି ଅତୀତର ପାରମ୍ପରିକ ଖେଳ । ଅତୀତରେ ଯେଉଁ ଖେଳ ଧୀରେ ଧୀରେ ବନ୍ଦ ହେବାକୁ ବସିଲାଣି ସେହି ଖେଳକୁ ପିଲାମାନେ ଏବେ ବି ଖେଳୁଛନ୍ତି । ଗଂଜାମ ଜିଲ୍ଲା ଭଂଜନଗର ନିକଟସ୍ଥ ପଳାସପଲ୍ଲୀ ଗାଁର ପିଲାମାନେ ଏମିତି କିଛି ପାରମ୍ପରିକ ଖେଳ ଖେଳୁଛନ୍ତି । ବଞ୍ଚାଇ ରଖିଛନ୍ତି ଇତିହାସର ସେହି ଖେଳ ।

ପିଲାଙ୍କ ଏହି ଖେଳ ପୁରୁଣା ଦିନକୁ ମନେ ପକାଏ । ସତରେ ଏବେକାର ବ୍ୟସ୍ତ ବହୁଳ ଜୀବନରେ ସେହି ପିଲା ଦିନର ଖେଳ ହଜି ହଜି ଯାଉଛି । ପିଲାମାନେ ଡିଜିଟାଲ ଦୁନିଆରେ ରହିି ପୁରୁଣା ଦିନର ଖେଳକୁ ଭୁଲିବାକୁ ବସିଲେଣି । କିନ୍ତୁ ବାହାରେ ଏହି ସବୁ ଖେଳ ଖେଳିବା ଦ୍ୱାରା ପିଲାଙ୍କ ଶାରିରୀକ ଓ ମାନସିକ ଦକ୍ଷତାରେ ପରିବର୍ତ୍ତନ ହେବ ଏବଂ ପିଲାମାନେ ଖୁସି ରହିବେ ।