ବିକାଶକୁ ଚାହିଁ ବସିଛି ସାତଲହଡ଼ି ମଠ, ଜମି ହେରଫେର ତଦନ୍ତ କରିବେ ସରକାର

ଓଡ଼ିଆ ଭାଗବତର ରଚୟତା ତଥା ପଞ୍ଚଶଖାଙ୍କ ମଧ୍ୟରେ ଅନ୍ୟତମ ଅତିବଡ଼ି ଜଗନ୍ନାଥ ଦାସଙ୍କ ଏହା ଶେଷ ସମୟର ତପୋଭୂମି ଭାବେ ବେଶ ଜଣାଶୁଣା । ଜଗନ୍ନାଥ ଦାସଙ୍କୁ ରାଧା ଅଙ୍ଗ ସମ୍ଭୁତା ବୋଲି ବିଶ୍ୱାସ କରାଯାଏ । ତତ୍କାଳୀନ ସାମାଜିକ ବ୍ୟବସ୍ଥାରେ ଶୃଙ୍ଖଳା ରକ୍ଷା ନିମନ୍ତେ ଲୋକଙ୍କୁ ଭକ୍ତିର ରସ ପ୍ରଦାନ କରି ଅନେକ ରଚନା ଭେଟି ଦେଇଥିଲେ ଅତିବଡ଼ି । ଭକ୍ତିର ପ୍ରଧାନତା ଦେଖି ଶ୍ରୀଚତନ୍ୟ ଜଗନ୍ନାଥ ଦାସଙ୍କୁ ଏହି ଅତିବଡ଼ି ଉପାଧି ଦେଇଥିଲେ ।

ତେବେ ଘଟଣାକ୍ରମେ ରାଣୀ ହଂସପୁର ବା ବଡ଼ ଓଡ଼ିଆ ମଠକୁ ସେ ପରିତ୍ୟାଗ କରି ସମୁଦ୍ରଠାରୁ ସାତଟି ଲହଡ଼ି ଜାଗା ମାଗି ସେ ତାଙ୍କ ଶେଷ ଜୀବନ ତପସ୍ୟାରେ ବିତାଇଥିଲେ । ଅତିବଡ଼ିଙ୍କ ଏହି ଶେଷ ତପୋଭୂମି ସାତଲହଡ଼ି ମଠ ନାମରେ ଏବେ ଖ୍ୟାତ । ଆଜକୁ ୪୫ ବର୍ଷ ପୂର୍ବେ ଜନୈକ ବାଳକୃଷ୍ଣ ଦାସ ଏହି ପୀଠକୁ ଆସି ଏଠାରେ ନିଜର ଶେଷ ଜୀବନ କଟାଇଥିଲେ । ସେ ସମୟରେ କମିଟିର ସିଦ୍ଧାନ୍ତ ଅନୁଯାୟୀ ସେ ମଠର ତତ୍ତ୍ୱାବଧାରକ ରୂପେ ରହି ଠାକୁରଙ୍କ ସେବା ପୂଜା ଓ ଭଗବତ ଧ୍ୟାନରେ ନିମଗ୍ନ ରହିଥିଲେ । ପ୍ରାୟ ୨ ଏକର ଜମି ଉପରେ ବର୍ତ୍ତମାନର ସାତଲହଡ଼ି ମଠ ରହିଛି । ମଠରେ ମାର୍ବଲ ପ୍ରସ୍ତରରେ ନିର୍ମିତ ଅତିବଡ଼ିଙ୍କ ମୂର୍ତ୍ତି ସମେତ ପତିତପାବନ, ରାଧାକୃଷ୍ଣ, ଶାଳଗ୍ରାମ ଓ ଭାଗବତ ବାସୁଦେବ ପୋଥି ପୂଜା ପାଉଛି । ମଠରେ ଦୈନଦିନ ରୀତିନୀତି ମୁତାବକ ପୂଜା ଅନୁଷ୍ଠିତ ହେଉଛି । ନିତ୍ୟ ଭାଗବତ ପାରାୟଣ ହେଉଛି । ମଠରେ ମୁଖ୍ୟତଃ ଦୁଇଟି ଉତ୍ସବ ପାଳିତ ହେଉଛି । ଏହା ଭିତରୁ ଗୋଟିଏ ଭାଦ୍ରବ ଶୁକ୍ଳ ଅଷ୍ଟମୀ ବା ରାଧା ଅଷ୍ଟମୀ । ଏହିଦିନ ଅତିବଡ଼ିଙ୍କ ଜନ୍ମୋତ୍ସବ । ଅନ୍ୟଟି ମାଘ ଶୁକ୍ଳ ସପ୍ତମୀ ବା ଅତିବଡ଼ିଙ୍କ ତିରୋଧାନ ଉତ୍ସବ । ଏହି ଦୁଇଟି ଉତ୍ସବରେ ଅତିବଡ଼ି ଜଗନ୍ନାଥ ଦାସଙ୍କ ସ୍ମୃତି ରକ୍ଷା କମିଟି ପକ୍ଷରୁ ସାଂସ୍କୃତିକ ସମ୍ମିଳନୀ ଓ ଆଲୋଚନାଚକ୍ର ହେଉଛି ।

ପୂର୍ବରୁ ଏହି ମଠର ବିଜେସ୍ଥଳୀ ପ୍ରାୟ ୭ ଏକର ଜମିରେ ଥିଲା । ବିଧାନସଭାରେ ସାତଲହଡ଼ି ମଠ ପ୍ରସଙ୍ଗ ଉଠିବା ନେଇ ଜାଣିବା ପରେ ମାସକ ତଳେ ଜିଲ୍ଲା ପ୍ରଶାସନ ଚେଇଁ ଉଠିଥିଲା । ମଠର ସର୍ବାଙ୍ଗିନ ଉନ୍ନତି କରାଯିବ ଓ ଦଖଲ ଜମିକୁ ଫେରାଇ ଅଣାଯିବ ବୋଲି ଜିଲ୍ଲା ପ୍ରଶାସନର ଅଧିକାରୀମାନେ ସମୀକ୍ଷା ବୈଠକ କରି ସୂଚନା ଦେଇଥିଲେ । ଜିଲ୍ଲାପାଳ ଏହି କମିଟି ଅଧ୍ୟକ୍ଷ ଥିବା ବେଳେ ସମ୍ପାଦକ ରହିଛନ୍ତି ଜିଲ୍ଲା ସଂସ୍କୃତି ଅଧିକାରୀ । ମଠର ବିକାଶ କରିବା ନିମନ୍ତେ ୧୦ ବର୍ଷ ତଳେ ପଡ଼ିଥିବା ଭିତ୍ତିପ୍ରସ୍ତରର ଉଦ୍ଦେଶ୍ୟ ଏପର୍ଯ୍ୟନ୍ତ ପୂରଣ ହୋଇପାରିଲା ନାହିଁ । ଏଠାରେ ଅତିବଡ଼ିଙ୍କ ଜୀବନ ଗାଥା ଓ ଓଡ଼ିଆ ଭାଗବତ ରଚନା ନିମନ୍ତେ ସେ କରିଥିବା ଉଦ୍ୟମକୁ ଏଠାରେ ପ୍ରତିମୂର୍ତ୍ତି ସ୍ଥାପନ କରି ଲୋକଲୋଚନକୁ ଆଣିବାକୁ ନିଷ୍ପତ୍ତି ହୋଇଥିଲା । ମଠର ଜୀର୍ଣ୍ଣୋଦ୍ଧାର ନିମନ୍ତେ ରାଜ୍ୟ ପ୍ରତ୍ନତତ୍ତ୍ୱ ବିଭାଗକୁ ଦାୟିତ୍ୱ ଦିଆଯାଇଥିଲା । କୋଟି କୋଟି ଟଙ୍କା ମଂଜୁର ହୋଇଥିଲା । ହେଲେ ସରକାରୀ ଏହି ଅନୁଦାନ ବାଟମାରଣା କରିନେଲେ ଅଧିକାରୀ, ଠିକାଦାର ଓ ଯନ୍ତ୍ରୀ । ପ୍ରକଳ୍ପକୁ ଅଧାରେ ଛାଡ଼ି ସମସ୍ତେ ପଳାଇଲେ ।

ଏନେଇ ମଠର ତତ୍ତ୍ୱାବଧାରକ ବ୍ରହ୍ମଚାରି ବାମଦେବ ନନ୍ଦ କହିଛନ୍ତି, ପ୍ରଶାସନ ମଠର ବିକାଶ ନିମନ୍ତେ ଦୃଷ୍ଟି ଦେଉନି । ନଚେତ ଏହି ପୁଣ୍ୟସ୍ଥଳ ଏଭଳି ଅବ୍ୟବସ୍ଥାରେ ନଥାଆନ୍ତା । ପ୍ରତିଦିନ ମଠକୁ ବହୁ ସଂଖ୍ୟକ ଶ୍ରଦ୍ଧାଳୁ ଆସୁଛନ୍ତି । ଯଥା ସମ୍ଭବ ସେମାନଙ୍କ ସେବା କରାଯାଉଛି । ରହିବା ନିମନ୍ତେ ଘର ଓ ଅନୁସଙ୍ଗିକ ବ୍ୟବସ୍ଥା ନଥିବାରୁ ଅଧିକ ସେବା ଦିଆଯାଇପାରୁନି । ସେପଟେ ବିଧାନସଭାରେ ମଠର ୭ ଏକର ଜମି ରହିଥିବା ବାବଦରେ ପ୍ରଶାସନ କ’ଣ ଅନୁସନ୍ଧାନ କରିଛି ଜଣାଇବାକୁ ଲିଖିତ ପ୍ରଶ୍ନ ଆସିଛି । ଉତ୍ତରରେ ଆଇନ ମନ୍ତ୍ରୀ ଜଣାଇଛନ୍ତି, ସତଲହଡ଼ି ମଠ ଅତିବଡ଼ିଙ୍କ ସମାଧୀ ପୀଠ । ଏହା ବଡ଼ ଓଡ଼ିଆ ମଠର ଏକ ଶାଖା ମଠ । ପୁରୀ ଜିଲ୍ଲା ପ୍ରଶାସନ ଦ୍ୱାରା ଜିଲ୍ଲାପାଳଙ୍କ ଅଧ୍ୟକ୍ଷତାରେ ଅତିବଡ଼ି ଜଗନ୍ନାଥ ଦାସଙ୍କ ସ୍ମୃତି ରକ୍ଷା କମିଟି ଗଠନ ହୋଇଛି । ଏହି ମଠର ଜମି ପରିମାଣ ୨.୬୭୦ ଏକର । ମାତ୍ର ବର୍ତ୍ତମାନର ଜମିର ସ୍ଥିତି ସମ୍ପର୍କରେ ବିଭାଗ ପାଖରେ ସୂଚନା ନାହିଁ । ମଠ ଜମିର ବର୍ତ୍ତମାନର ସ୍ଥିତି ସମ୍ପର୍କରେ ଅନୁସନ୍ଧାନ କରି କେହି ଅସାଧୁ ଉପାୟରେ ଜମି ମାଡ଼ି ବସିଥିବାର ପ୍ରମାଣ ମିଳିଲେ ଉକ୍ତ ଜମିକୁ କମିଟି କିମ୍ବା ସମ୍ପୃକ୍ତ ଅନୁଷ୍ଠାନକୁ ଦେବୋତ୍ତର ଆଇନର ଧାରା ୨୫ ଅନୁଯାୟୀ ହସ୍ତାନ୍ତର କରିବାକୁ ପଦକ୍ଷେପ ନିଆଯିବ । ଏହା ଜଣାପଡ଼ିବା ପରେ ମଠ ପ୍ରକୃତ ସ୍ଥିତି ଯାଞ୍ଚ ଜୋରଦାର ହୋଇଛି । ମଠର ବାଇ-ଲ’ ଠିକ୍ ନଥିବା ଦର୍ଶାଇ ଏହାକୁ ଆବଶ୍ୟକ ପରିବର୍ତ୍ତନ କରିବାକୁ ଏହାର ତତ୍ତ୍ୱାବଧାରକ ଶ୍ରୀ ନନ୍ଦ ଦାବି କରିଛନ୍ତି ।