[ad_1]
ଡବ୍ଲିନ୍ : ଭାରତ ଓ ଆୟର୍ଲାଣ୍ଡ ମଧ୍ୟରେ ଚଳିତ ଟି-୨୦ ସିରିଜ୍ର ଦ୍ୱିତୀୟ ମାଚ୍ ଆଜି ସ୍ଥାନୀୟ ଦ ଭିଲେଜ୍ (ମଲାହାଇଡ୍)ରେ ଖେଳାଯିବ । ପ୍ରଥମ ମ୍ୟାଚ୍ ଡିଏଲ୍ ମେଥଡ୍ରେ ୨ ରନ୍ରେ ଜିତିବା ପରେ ଟିମ୍ ଇଣ୍ଡିଆ ସିରିଜ୍ରେ ୧-୦ରେ ଆଗୁଆ ରହିଛି । କ୍ୟାପ୍ଟେନ୍ ଜସ୍ପ୍ରୀତ୍ ବୁମ୍ରାଙ୍କ ଚମତ୍କାର ପ୍ରତ୍ୟାବର୍ତ୍ତନରେ ଉତ୍ସାହିତ ଟିମ୍ ରବିବାରର ମ୍ୟାଚ୍କୁ ଜିତି ତିନି ମ୍ୟାଚ୍ ବିଶିଷ୍ଟ ସିରିଜ୍ରେ ଅଜେୟ ଅଗ୍ରଣୀ ହାସଲ କରିବା ଉଦ୍ଦେଶ୍ୟରେ ରହିବ ।
ଏହି ବିଜୟ ଆୟର୍ଲାଣ୍ଡ ବିପକ୍ଷରେ ଭାରତ ହ୍ୟାଟ୍ରିକ୍ ମଧ୍ୟ ପୂରା କରିପାରେ । ଏହା ସହିତ ଭାରତ ଆସନ୍ତାକାଲି ଭଲ ପାଗର ଆରମ୍ଭ କରିବ । ଫଳରେ ଯୁବ ବ୍ୟାଟର୍ମାନଙ୍କୁ ନିଜ କୌଶଳ ପ୍ରଦର୍ଶନ କରିବାକୁ ସୁଯୋଗ ମିଳିପାରିବ । ପ୍ରଥମ ମ୍ୟାଚ୍ରେ ବର୍ଷା କାରଣରୁ ଭାରତ ମାତ୍ର ୬.୫ ଓଭର୍ ଖେଳିଥିବାରୁ ମଧ୍ୟକ୍ରମ ବ୍ୟାଟର୍ଙ୍କୁ ସୁଯୋଗ ମିଳିପାରିନଥିଲା । ଉଦୀୟମାନ ତାରକା ଶିବମ ଦୁବେ, ଋତୁରାଜ ଗାଏକ୍ୱାଡ୍ ଏବଂ ରିଙ୍କୁ ସିଂହଙ୍କ ପରି ବ୍ୟାଟର୍ଙ୍କୁ କ୍ରିଜ୍ରେ ପର୍ଯ୍ୟାପ୍ତ ସମୟ ମିଳିବ ବୋଲି ଆଶା କରିବେ । ସେହିପରି ଓପ୍ନର୍ ଯଶସ୍ୱୀ ଜୈସ୍ୱାଲ୍ ବଡ଼ ଇନିଂସ୍ ଖେଳିବା ଉଦ୍ୟମ କରିବେ ।
ଅନ୍ୟପକ୍ଷରେ ପ୍ରଥମ ବଲ୍ରେ ଆଉଟ୍ ହୋଇଥିବା ତିଳକ ବର୍ମା ୱେଷ୍ଟଇଣ୍ଡିଜ୍ ବିପକ୍ଷ ନିଜ ପ୍ରଦର୍ଶନକ ବଜାୟ ରଖିବା ପାଇଁ ଚାହିଁବେ । ଟିମ୍ର ଶୀର୍ଷକ୍ରମରେ ଅଧିକାଂଶ ଖେଳାଳି ନିକଟରେ ଅନ୍ତର୍ଜାତୀୟ ଡେବ୍ୟୁ କରିଛନ୍ତି । ଆହତ ସମସ୍ୟାରୁ ମୁକୁଳିବା ପରେ ବୁମ୍ରା ଓ ପ୍ରସିଦ୍ଧ କ୍ରିଷ୍ଣା ଆକର୍ଷଣୀୟ ପ୍ରତ୍ୟାବର୍ତ୍ତନ କରିଛନ୍ତି । ପ୍ରଥମ ମ୍ୟାଚ୍ରେ ସେପରି ଖାସ୍ ବୋଲିଂ କରିପାରି ନଥିବା ୱାଶିଂଟନ୍ ସୁନ୍ଦରଙ୍କ ଠାରୁ ଟିମ୍ ଆସନ୍ତାକାଲି କିଛି ଅଲଗା ଆଶା କରିବ । ସୂଚନାଯୋଗ୍ୟ, ଏହି ସିରିଜ୍ ପୂର୍ବରୁ ଭାରତ ଦୁଇଥର ଆୟର୍ଲାଣ୍ଡ ଗସ୍ତ କରିଥିଲା । ୨୦୧୮ରେ ବିରାଟ କୋହଲିଙ୍କ ନେତୃତ୍ୱରେ ଟିମ୍ ଇଣ୍ଡିଆ ଦୁଇ ମ୍ୟାଚ୍ ବିଶିଷ୍ଟ ସିରିଜ୍ ୨-୦ରେ ନିଜ ନାମରେ କରିଥିଲା । ଏହାପରେ ୨୦୦୨ରେ ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ଏଠାକୁ ଆସିଥିବା ଟିମ୍ ମଧ୍ୟ ୨-୦ରେ ସିରିଜ୍ କବ୍ଜା କରିଥିଲା ।
ଚଳିତ ସିରିଜ୍ରେ ପ୍ରଥମ ଥର ତିନିଟି ମ୍ୟାଚ୍ ଖେଳାଯାଉଥିବା ବେଳେ ଭାରତ ସିରିଜ୍ ଜିତିଲେ ଆୟର୍ଲାଣ୍ଡ ବିପକ୍ଷରେ ଏହା ହ୍ୟାଟ୍ରିକ୍ ସିରିଜ୍ ବିଜୟ ହେବ । ବୁମ୍ରାଙ୍କ ନେତୃତ୍ୱରେ ଟିମ୍ ଇଣ୍ଡିଆ ପ୍ରଥମ ଥର ପାଇଁ ଟି-୨୦ ସିରିଜ୍ ଖେଳୁଥିବାରୁ ଏହା ମଧ୍ୟ ତାଙ୍କ ପାଇଁ ଆକର୍ଷଣୀୟ ଅଭିଯାନ ହେବ । ଅନ୍ୟପକ୍ଷରେ ପୂର୍ବ ମ୍ୟାଚ୍ରେ ଆୟର୍ଲାଣ୍ଡ ଟିମ୍ ପ୍ରଥମ ଓଭର୍ରେ ବୁମ୍ରାଙ୍କ ଡବଲ୍ ଝଟ୍କା ସତ୍ତ୍ୱେ ପ୍ରତ୍ୟାବର୍ତ୍ତନ କରିବାରେ ସଫଳ ହୋଇଥିଲା । ସିନିୟର୍ ଖେଳାଳିଙ୍କ ଅନୁପସ୍ଥିତି ସତ୍ତ୍ୱେ ଶକ୍ତିଶାଳୀ ଟିମ୍ ଇଣ୍ଡିଆକୁ ଚ୍ୟାଲେଞ୍ଜ୍ କରିବାକୁ ହେଲେ ଆୟର୍ଲାଣ୍ଡକୁ ସମସ୍ତ ବିଭାଗରେ ଉନ୍ନତ ପ୍ରଦର୍ଶନ କରିବାକୁ ହେବ । ସିରିଜ୍କୁ ପ୍ରତ୍ୟାବର୍ତ୍ତନ କରିବାକୁ ହେଲେ ଅନୁଭବୀ ଖେଳାଳି ପଲ୍ ଷ୍ଟିର୍ଲିଂ, ଆଣ୍ଡ୍ର୍ୟୁ ବାଲ୍ବର୍ନି, ଜୋଶୁଆ ଲିଟିଲ୍, କ୍ରେଗ୍ ୟଙ୍ଗ୍ ଏବଂ ଜର୍ଜ ଡକ୍ରେଲ୍ଙ୍କୁ ଉନ୍ନତ ପ୍ରଦର୍ଶନ କରିବାକୁ ପଡ଼ିବ ।
[ad_2]
