ପାଞ୍ଜି ସମନ୍ବୟ ପାଇଁ ଶ୍ରୀମନ୍ଦିର ପ୍ରଶାସନର ପୁଣି ଚିଠି: ୧୪ ତାରିଖ ଭିତରେ ଦାଖଲ କରିବେ ପାଣ୍ଡୁଲିପି

ବ୍ୟକ୍ତିଗତ ୱାଟ୍ସଅପ ନମ୍ବର ଓ ପୋଷ୍ଟାଲ ଜରିଆରେ ଏହି ଚିଠି ପଠାଯାଇଛି। ଶ୍ରୀମନ୍ଦିର କାର୍ଯ୍ୟାଳୟରୁ ସମସ୍ତ ପାଞ୍ଜିକାରଙ୍କ କାର୍ଯ୍ୟାଳୟକୁ ବି ଯୋଗାଯୋଗ କରି ପାଣ୍ଡୁଲିପି ଦାଖଲ କରିବାକୁ କୁହାଯାଇଛି।

ରାଧାରମଣ ପଞ୍ଜିକା, କୋହେନୂର ପ୍ରେସ ପଞ୍ଜିକା, ଭାଗ୍ୟଜ୍ୟୋତି ପ୍ରେସ୍ ପଞ୍ଜିକା, ଅରୁଣୋଦୟ ପ୍ରେସ୍ ଖଡ଼ିରତ୍ନ ପଞ୍ଜିକା, ସାମନ୍ତ ଚନ୍ଦ୍ରଶେଖର ପଞ୍ଜିକା, ଉତ୍କଳ ଜାତୀୟ ଖଡ଼ିରତ୍ନ ପଞ୍ଜିକା, ଦୈବ୍ୟଜ୍ଞ ସିଦ୍ଧାନ୍ତ ପଞ୍ଜିକା ଓ ଭାଗ୍ୟଦୀପ ପ୍ରେସ୍ ପଞ୍ଜିକା, ଏଭଳି ୮ଟି ପଞ୍ଜିକାର ଗଣକ, ପ୍ରକାଶକ ଓ ସଭ୍ୟମାନଙ୍କୁ ଏହି ଚିଠି କରାଯାଇଛି। ପାଣ୍ଡୁଲିପି ହସ୍ତଗତ ହେବା ପରେ ପାଞ୍ଜି ସମନ୍ବୟ ବୈଠକ କରାଯିବ ବୋଲି ଜଣାପଡ଼ିଛି। ଏ ଭିତରେ କେବଳ ରାଧାରମଣ ଓ କୋହେନୂର ପଞ୍ଜିକା ସେମାନଙ୍କୁ ପାଣ୍ଡୁଲିପି ଦାଖଲ କରିଛନ୍ତି। ରାଧାରମଣ ପଞ୍ଜିକା ୧୨ ମାସର ପାଣ୍ଡୁଲିପି ଦାଖଲ କରିଥିବାବେଳେ କୋହେନୂର କେବଳ ୬ ମାସର ପାଣ୍ଡୁଲିପି ଦାଖଲ କରିଛି। ଏଣୁ କୋହେନୂର ପଞ୍ଜିକାକୁ ବାକି ୬ ମାସର ପାଣ୍ଡୁଲିପି ଦାଖଲ କରିବାକୁ କୁହାଯାଇଛି। ସେହିପରି ଅନ୍ୟମାନଙ୍କୁ ୧୨ ମାସର ପାଣ୍ଡୁଲିପି ଦାଖଲ କରିବାକୁ କୁହାଯାଇଛି।

ଦୁଇ ପାଞ୍ଜି ଭିତରୁ ଜଣେ ୧୨ ମାସର ଓ ଜଣେ ୬ ମାସର ପାଣ୍ଡୁଲିପି ଦେଇଛନ୍ତି

ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ ସମସ୍ତ ପଞ୍ଜିକାକୁ କରିଥିବା ଚିଠି(୧୬୨୨୪)ରେ ଉଲ୍ଲେଖ କରିଛନ୍ତି, ୨୦୨୫-୨୬ ବର୍ଷର ପଞ୍ଜିକା ପାଣ୍ଡୁଲିପି ସଂଶୋଧନ କାର୍ଯ୍ୟ ମୁକ୍ତିମଣ୍ଡପ ପଣ୍ଡିତସଭାଙ୍କ ଦ୍ବାରା ଚଳିତବର୍ଷ ଅକ୍ଟୋବର ଶେଷ ସପ୍ତାହରୁ ଆରମ୍ଭ ହେବା ପାଇଁ ସ୍ଥିର କରାଯାଇଥିଲା। କିନ୍ତୁ ପାଣ୍ଡୁଲିପି ସଂଶୋଧନ ପାଇଁ ସମସ୍ତ ପାଞ୍ଜିର ପାଣ୍ଡୁଲିପି ଅକ୍ଟୋବର ୨୦ ତାରିଖ ସୁଦ୍ଧା ଦାଖଲ ମୁକ୍ତିମଣ୍ଡପ ପଣ୍ଡିତସଭା ନିକଟକୁ ପଠାଇବାକୁ ଅନୁରୋଧ କରାଯାଇଥିଲା। କିନ୍ତୁ ଅଦ୍ୟାବଧି ମୁକ୍ତିମଣ୍ଡପ ପଣ୍ଡିତସଭାଙ୍କ ନିକଟକୁ ସଂଶୋଧନ ପାଇଁ ଅଧିକାଂଶ ପାଞ୍ଜି ପାଣ୍ଡୁଲିପି ପଠାଇନାହାନ୍ତି। ଯେଉଁ ପାଣ୍ଡୁଲିପି ଆସିଛି, ସେହି ପଞ୍ଜିକାର ସଂଶୋଧନ କାର୍ଯ୍ୟ ଆରମ୍ଭ ହେଲାଣି। ପାଣ୍ଡୁଲିପିଗୁଡ଼ିକ ଧାର୍ଯ୍ୟ ସମୟ ଭିତରେ ନ ପହଞ୍ଚିଲେ, ତାହା ସଂଶୋଧନ ହେବାରେ ବିଳମ୍ବ ହେବା ସହ ଶ୍ରୀମନ୍ଦିର ପର୍ବପର୍ବାଣୀ ତାଲିକା ପ୍ରକାଶରେ ଅତ୍ୟଧିକ ବିଳମ୍ବ ହେବ। ଏହାକୁ ହୃଦୟଙ୍ଗମ କରି ପଞ୍ଜିକା ପାଣ୍ଡୁଲିପି ମୁକ୍ତିମଣ୍ଡପ ପଣ୍ଡିତସଭା ଓ ଶ୍ରୀମନ୍ଦିର କାର୍ଯ୍ୟାଳୟ ନିକଟକୁ ଆସନ୍ତା ୧୪ ତାରିଖ ସୁଦ୍ଧା ପଠାଇବାକୁ ଶ୍ରୀ ସାହୁ ନିବେଦନ କରିଛନ୍ତି।