ରିଆମାଳ: ଦେବଗଡ଼ ଜିଲ୍ଲା ରିଆମାଳ ରେଞ୍ଜ ନୂଆଡିହି କଣ୍ଠିମାଳ ଗ୍ରାମ ନିକଟସ୍ଥ ରେଙ୍ଗାଳି ଜଳଭଣ୍ଡାରରୁ ଆଜି ଏକ କଲରାପତରିଆ ବାଘର ମୃତଦେହ ଉଦ୍ଧାର କରାଯାଇଛି। ଗୁରୁବାର ଦ୍ୱିପହରରେ କଲରାପତରିଆର ଶବ ଭାସୁଥିବା ଦେଖି ସ୍ଥାନୀୟ ଲୋକେ ବନ ବିଭାଗକୁ ସୂଚନା ଦେଇଥିଲେ। ଦେବଗଡ଼ ଡିଏଫ୍ଓ ମଗର ଧାନାଜୀ ରାଓସୋ, ରିଆମାଳ ରେଞ୍ଜର୍ ନିରଞ୍ଜନ ଧରୁଆ ଓ ବିଭାଗୀୟ କର୍ମଚାରୀ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ଘଟଣାର ତଦନ୍ତ କରିଥିଲେ। ତେବେ ବାଘର କିପରି ମୃତ୍ୟୁ ହେଲା, କେଉଁ ଆଡ଼ୁ ଭାସିଆସିଛି ତାହା ବର୍ତ୍ତମାନ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ମୃତବାଘର ବୟସ ଦୁଇରୁ ଅଢ଼େଇବର୍ଷ ହୋଇଥିବା ବେଳେ ପାଣିରେ ବୁଡ଼ି ତାର ମୃତ୍ୟୁ ହୋଇଥିବା ଅନୁମାନ କରାଯାଉଛି। ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁ କାରଣ ସ୍ପଷ୍ଟ ହେବ ବୋଲି ଡିଏଫ୍ଓ ଶ୍ରୀ ରାଓସୋ ସୂଚନା ଦେଇଛନ୍ତି।
