ହନିମୁନ୍ ରୁ ଫେରୁଥିଲେ ନବବିବାହିତ ଦମ୍ପତି, ମାତ୍ର ଘର ଠାରୁ କିଛି ବାଟ ଦୂରରେ ଘଟିଗଲା କିଛି ଏମିତି…
କେରଳ: କେରଳର ପଠନମଥିଟା ଜିଲ୍ଲାରେ ଏକ ମର୍ମଦୁନ୍ତ ସଡ଼କ ଦୁର୍ଘଟଣା ଘଟିଛି । ଦୁର୍ଘଟଣାରେ ନବବିବାହିତ ଦମ୍ପତିଙ୍କ ସମେତ ମୋଟ୍ ୪ ଜଣଙ୍କର ମୃତ୍ୟୁ ହୋଇଛି । ପୁନାଲୁରୁ-ମୁଭାଟୁପୁଜା ରାଜ୍ୟ ରାଜପଥରେ ଏହି ଦୁର୍ଘଟଣା ଘଟିଛି ।
ଘଟଣା ମୁତାବକ, ରବିବାର ସକାଳ ପ୍ରାୟ ୫ ଟା ସମୟରେ ତୀର୍ଥଯାତ୍ରୀଙ୍କୁ ନେଇ ସାବରିମାଲା ଅଭିମୁଖେ ଯାଉଥିବା ଏକ ବସ୍ ସହିତ ଏକ କାରର ମୁହାଁମୁହିଁ ଧକ୍କା ହୋଇଥିଲା । ଫଳରେ କାରରେ ଯାତ୍ରା କରୁଥିବା ନବ ବିବାହିତ ଦମ୍ପତିଙ୍କ ସମେତ ପରିବାରର ଚାରିଜଣ ସଦସ୍ୟଙ୍କ ମୃତ୍ୟୁ ଘଟିଛି । ଏହି ଦୃଶ୍ୟ ଦେଖି ସ୍ଥାନୀୟ ଲୋକେ ସେଠାକୁ ଦୌଡ଼ି ଆସିଥିଲେ ଏବଂ କାରରେ ଥିବା ଯାତ୍ରୀମାନଙ୍କ କ୍ଷତିଗ୍ରସ୍ତ ଗାଡ଼ିରୁ ଉଦ୍ଧାର କରିଥିଲେ । ଏହାପରେ ସେମାନେ ପୋଲିସକୁ ଘଟଣା ସମ୍ପର୍କରେ ସୂଚନା ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଁଚି ସମସ୍ତ ଆହତଙ୍କୁ ସ୍ଥାନୀୟ ଡାକ୍ତରଖାନାକୁ ପଠାଇଥିଲା । ହେଲେ ଘଟଣାସ୍ଥଳରେ ପରିବାରର ୩ ଜଣଙ୍କର ମୃତ୍ୟୁ ଘଟିଥିବା ବେଳେ ଡାକ୍ତରଖାନା ଯିବା ସମୟରେ ରାସ୍ତାରେ ଜଣଙ୍କର ମୃତ୍ୟୁ ହୋଇଥିବା ପୋଲିସ କହିଛି । ସେପଟେ, ବସ୍ରେ ଥିବା କୌଣସି ଯାତ୍ରୀ ଆଘାତ ହୋଇନଥିବା ଜଣାପଡ଼ିଛି ।
ପ୍ରାଥମିକ ଅନୁସନ୍ଧାନରୁ ଜଣାପଡ଼ିଛି ଯେ, ନବ ବିହାହିତ ଦମ୍ପତିଙ୍କ ଗତ ମାସରେ ବିବାହ ହୋଇଥିଲା । ମାଲେସିଆରୁ ହନିମୁନ୍ ସାରି ଫେରିବା ପରେ ବିମାନବନ୍ଦରରୁ ନିଜ ପରିବାର ସହିତ ଘରକୁ ଫେରୁଥିଲେ । ମାତ୍ର, ଘରଠାରୁ ୧୦ କିଲୋମିଟର ଦୂରରେ ସେମାନଙ୍କ ସହିତ ଏହି ଦୁର୍ଘଟଣା ଘଟିଯାଇଛି । ପୋଲିସ ଘଟଣାର ଏକ ମାମଲା ରୁଜୁ ତଦନ୍ତ ଆରମ୍ଭ କରିଛି ।
