ଆଜି କାଲି ଲୋକେ ନିଜ ବଢୁଥିବା ଓଜନକୁ ନେଇ ବେଶ ଚିନ୍ତିତ । ନିଜ ଓଜନକୁ କମ କରିବା ପାଇଁ ଲୋକେ ଦିନ ରାତି ଜିମରେ ବିତେଇବା ଠାରୁ ଆରମ୍ଭ କରି ସକାଳ ସନ୍ଧ୍ୟାରେ ୱାକ କରିବାକୁ ପଛାଉଛନ୍ତି । କିନ୍ତୁ ଆପଣ ଜାଣନ୍ତି କି ଆପଣଙ୍କ ଖାଦ୍ୟ ଅଭ୍ୟାସ ସହ ହିଁ ଆପଣଙ୍କର ମୋଟାପଣ ସମ୍ଭନ୍ଧ ସିଧାସଳକ ଅଛି । ଭାରତୀୟ ସଂସ୍କୃତିରେ ଏକାଠି ବସି ଖାଇବା ଅଭ୍ୟାସ ରହିଛି । ଯଦି ଆପଣ ନିଜ ଶରୀରକୁ ଅଧିକ ସୁଢଳ ସୁନ୍ଦର କରିବାକୁ ଚାହୁଁଛନ୍ତି ତେବେ ଆଉ ଏକାଠି ବସି ଭୋଜନ ନ କରି ଏକୁଟିଆ ହିଁ ଭୋଜନ କରନ୍ତୁ । କାରଣ ଏକ ଗବେଷଣାରୁ ଜଣାଯାଇଛି ଯେ ଏକାଠି ବସି ଭୋଜନ କରିବା ଦ୍ୱାରା ବ୍ୟକ୍ତି ଅଧିକ ଖାଇଦେଇଥାନ୍ତି ।
ଆମେରିକାର କ୍ଲିନିକାଲ ନ୍ୟୁଟ୍ରିସନ ସୋସାଇଟି ଦ୍ୱାରା ପ୍ରକାଶିତ ଏକ ରିପୋର୍ଟ ଅନୁଯାୟୀ ଦୁଇ ଜଣାରୁ ଅଧିକ ବସି ଭୋଜନ କରିବା ଦ୍ୱାରା ବ୍ୟକ୍ତି ନିଜ ସାମର୍ଥ୍ୟ ଠାରୁ ଅଧିକ ଖାଇଥାନ୍ତି କିନ୍ତୁ ଏକୁଟିଆ ଖାଇଲେ କେତେ ଗୁଣ କମ ଖାଇଥାନ୍ତି । ବ୍ରିଟେନ ସ୍ଥିତ ବର୍ମିଙ୍ଗହାମ ବିଶ୍ୱବିଦ୍ୟାଳୟର ଗବେଷକ ହେଲେନ ରୁଡାକ ଏକ ଗବେଷଣାରୁ ଜାଣିପାରିଛନ୍ତି କି ଏକାଠି ବସି ଖାଇଲେ ବ୍ୟକ୍ତି ପ୍ରାୟ ୪୮ ପ୍ରତିଶତ ଅଧିକ ଖାଇବା ଖାଇଦେଇଥାନ୍ତି । ମହିଳା ମାନେ କିନ୍ତୁ ଏକ୍ଷେତ୍ରରେ ପୁରୁଷ ମାନଙ୍କ ଠାରୁ କିଛିଟା ପଛୁଆ ଥିଲେ ବି ସେମାନେ ଏକାଠି ବସି ଖାଇଲେ ୨୯ ପ୍ରତିଶତ ଅଧିକ ଭୋଜନ କରିଥାନ୍ତି ।
ଏପର୍ଯ୍ୟନ୍ତ ଏ କ୍ଷେତ୍ରରେ ପ୍ରାୟ ୪୨ଟି ଗବେଷଣା ହୋଇସାରିଥିବ ବେଳେ ଏଗୁଡିକର ଫଳାଫଳକୁ ନେଇ ବୈଜ୍ଞାନିକ ମାନେ ଏହିପରି ଏକ ସିଦ୍ଧାନ୍ତରେ ଉପନୀତ ହୋଇଛନ୍ତି । ପୂର୍ବରୁ ଏକ ଗବେଷଣାରୁ ଜଣା ପଡିଥିଲା କି ଏକାଠି ଖାଇଲେ ବ୍ୟକ୍ତି ଏକ ଅଲଗା ପ୍ରକାର ଆନନ୍ଦ ମିଳିଥାଏ । ଏହା ଏକ ପ୍ରକାର ମାନସିକ ଶାନ୍ତି ମଧ୍ୟ ଦେଇଥାଏ । ବିଶ୍ୱାସ କରାଯାଏ କି ଏହା ଦ୍ଵାରା ବ୍ୟକ୍ତିର ନିଃସଙ୍ଗତା ଦୂର ହୋଇଥାଏ । ତେଣୁ କରି ମିଶି କରି ଖାଇବା ଦ୍ୱାରା ନିଜ ଅଜାଣତରେ ବ୍ୟକ୍ତି ଅଧିକ ଭୋଜନ କରିଦେଇଥାନ୍ତି । ଫଳରେ ମୋଟାପଣ ବୃଦ୍ଧି ପାଇଥାଏ ।
