[ad_1]
ଖଲ୍ଲିକୋଟ: ଖଲ୍ଲିକୋଟ ଥାନା ଅନ୍ତର୍ଗତ କୈରାଶି ଗ୍ରାମରେ ପୂର୍ବ ଶତ୍ରୁତାକୁ କେନ୍ଦ୍ର କରି ଜଣେ ନାବାଳକ ଅନ୍ୟ ଜଣେ ନାବାଳକକୁ ଆଜି ସନ୍ଧ୍ୟାରେ ଛୁରୀ ଭୂଷି ହତ୍ୟା କରିଥିବା ଅଭିଯୋଗ ହୋଇଛି । କୈରାଶି ଗ୍ରାମର ଅରୁଣ ଦାସଙ୍କ ପୁଅ ରାଜେଶ ଦାସ (୧୭) ଆଜି ସନ୍ଧ୍ୟାରେ ଗ୍ରାମର ସାଗର ବନ୍ଧ ମାଛ ମାର୍କେଟକୁ ଯାଇଥିଲେ ।
ଏହି ସମୟରେ ସେଠାରେ ସୁଯୋଗ ଅପେକ୍ଷାରେ ଥିବା ଆଉ ଜଣେ ନାବାଳକ ଛୁରୀରେ ରାଜେଶଙ୍କୁ ଆକ୍ରମଣ କରିଥିଲା । ରାଜେଶଙ୍କ ପେଟ, ଛାତି ଓ ଗୋଡ଼ରେ ଛୁରୀ ମାଡ଼ ହୋଇଥିବାରୁ ସେ ଗୁରୁତର ହୋଇପଡିଥିଲେ । ତାଙ୍କୁ ଚିକିତ୍ସା ପାଇଁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ତେବେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ଜଣାପଡିଛି । ଖବର ପାଇ ଖଲ୍ଲିକୋଟ ଥାନା ଅଧିକାରୀ ଜଗନ୍ନାଥ ମଲ୍ଲିକ, ଏସ୍ଆଇ ପାର୍ଥ ପ୍ରତିମ ଦେବତା ମେଡ଼ିକାଲରେ ପହଞ୍ôଚଥିଲେ ।
ଏହି ହତ୍ୟାକାଣ୍ଡ ପୂର୍ବ ଶତ୍ରୁତାରୁ ହୋଇଥିବା ଜଣାପଡିଛି । ଗତ କିଛି ମାସ ତଳେ କୈରାଶି ଗ୍ରାମରେ କ୍ରିକେଟ ଖେଳକୁ ନେଇ ଗଣ୍ଡଗୋଳ ହୋଇଥିଲା । ଏହି କାରଣରୁ ଆଜି ହତ୍ୟାର ଶିକାର ହୋଇଥିବା ରାଜେଶ ଦାସଙ୍କ ସମେତ ୪ ଜଣ ନାବାଳକ ଆଜିର ଅଭିଯୁକ୍ତ ନାବାଳକକୁ ହକିଷ୍ଟିକରେ ପ୍ରବଳ ପିଟୁଥିବା ଭିଡିଓ ସୋସିଆଲ ମିଡ଼ିଆରେ ଭାଇରାଲ ହୋଇଥିଲା ।
ଥାନାରେ ଅଭିଯୋଗ ପରେ ପୁଲିସ ଖଲ୍ଲିକୋଟ ଥାନା କେସ ନମ୍ବର ୩୩୦/୨୦୨୩ ଅନୁଯାୟୀ ମାମଲା ରୁଜ୍ଜୁ କରି ୪ ନାବାଳକଙ୍କୁ ପୂର୍ବରୁ ଗିରଫ କରି ବାଳ ସୁଧାରଗୃହକୁ ପଠେଇ ଦେଇଥିଲା । ତେବେ ମାଡ଼ ଖାଇଥିବା ନାବାଳକ ଜଣକ ପ୍ରତିଶୋଧ ଅପେକ୍ଷାରେ ଥିଲା । ଆଜି ସୁଯୋଗ ପାଇ ପ୍ରତିଶୋଧ ନେଇଥିବା ପୁଲିସ ସୂତ୍ରରୁ ପ୍ରକାଶ ।
[ad_2]
