ସ୍ୱାଧୀନତା ଆନ୍ଦୋଳନ ସମୟରେ ହାକିମଙ୍କୁ ମାଡ଼ ମାରିଥିଲେ ଶାରଦା ବାବୁ, ୧୪ ବର୍ଷ ବୟସରେ ଯାଇଥିଲେ ଜେଲ୍

ବାସୁଦେବପୁର ବ୍ଲକ ଆରୁହା ପଞ୍ଚାୟତ ତୋଳମତୋଳା ଗ୍ରାମରେ ଶାରଦା ବାବୁଙ୍କ ଘର । ହାକିମ ପରି ଚେହେରା । ଇଂଗ୍ରେଜକୁ ତଡ଼ିବାକୁ ୧୪ ବର୍ଷରୁ ଭାରତ ଛାଡ଼ ଆନ୍ଦୋଳନରେ ସାମିଲ ହୋଇଥିଲେ । ସେତେବେଳେ ଜଣେ ସଦସ୍ୟ ନ ଥିଲେ, ସେ ନେତୃତ୍ୱ ନେଇଥିଲେ । ବିଭିନ୍ନ ବଣ ଜଙ୍ଗଲରେ ରହି ପ୍ରଜାମେଳି କରୁଥିଲେ । ଲୋକଙ୍କୁ ଇଂରେଜ ବିରୋଧରେ ଲଢେଇ ପାଇଁ ସାହସ ଦେଉଥିଲେ । ଶାରଦା ବାବୁଙ୍କ ବାବଦରେ ବ୍ରିଟିଶ ପୁଲିସ ସବୁ ତଥ୍ୟ ଜାଣି ମଧ୍ୟ ତାଙ୍କୁ ଧରିବାରେ ସକ୍ଷମ ହେଉ ନ ଥିଲେ । ଭାରତଛାଡ଼ ଆନ୍ଦୋଳନ ବେଳେ ବ୍ରିଟିଶ ପୁଲିସ ତୋଳମତୋଳା ଗଲା । ଶାରଦା ବାବୁ ଜାଣିଗଲେ ଆଉ ଘର ନିରାପଦ ନୁହଁ । ପରିବାରଠୁ ସେ ଲୁଚି ଆନ୍ଦୋଳନର ନେତୃତ୍ୱ ନେଉଥିଲେ । ଇରମରୁ ଇଞ୍ଚୁଡ଼ି, ପୁଣି ମୟୂରଭଞ୍ଜ ପର୍ଯ୍ୟନ୍ତ ସେ ପ୍ରଜାମେଳିର ନେତୃତ୍ୱ ନେଉଥିଲେ । ପୁଲିସ ତାଙ୍କ ଧରିବାକୁ ଜାଲ ବିଛାଇ ବାରବାର ବିଫଳ ହେଉଥିଲା । ଶେଷରେ ୧୯୪୬ ଏପ୍ରିଲ ମାସରେ ବାସୁଦେବପୁର ପଦ୍ମପୁରରେ ପ୍ରଜାମେଳି ପାଇଁ ଶାରଦା ବାବୁ ବଡ଼ ଆୟୋଜନ କରିଥିଲେ । ଏହି ମେଳିକୁ ସେ ପାଦଚଲା ରାସ୍ତା ଦେଇ ଆସୁ ଆସୁ କିଆପଡ଼ାରେ ବ୍ରିଟିଶ ପୁଲିସ ଧରି ନେଇଥିଲା ।

୧୪ ବର୍ଷରେ ପୁଲିସ ତାଙ୍କୁ ନେଇ ବାଲେଶ୍ୱର ଜେଲରେ ରଖିଥିଲା । ଦୋଷ ମାନିଗଲେ ଛଡ଼ା ଯିବ । ତୁମେ ନାବାଳକ ହୋଇଥିବାରୁ ଜେଲ ଦଣ୍ଡ ହେବନି । ସତକଥା ମାନିଯାଅ । ଇରମର ସଂଗ୍ରାମୀ କମଳାକାନ୍ତ କରଙ୍କ ବାବଦରେ କଣ ଜାଣିଛ କୁହ । ଏଭଳି କଥା କାଢିବାକୁ ହାକିମ ବାବୁ ଆଗରେ ପୁଲିସ ଛିଡ଼ା କରାଇଥିଲା । ହାକିମ ବାବୁଙ୍କ ହିନ୍ଦୁସ୍ଥାନ ବିରୋଧରେ ବୟାନ ଶୁଣି ସେ ତାତି ଯାଇଥିଲେ । ଭାରତମାତା କୀ ଜୟ କହି ହାକିମାଙ୍କୁ ମାଡ଼ ମାରିଥଲେ । ପୁଲିସ ଦ୍ୱାରା ଭଦ୍ରକ ମହତାବ କୋଠିରେ ଅଟକ ଥିବା ଶାରଦାଙ୍କୁ ପୁଣି ଗିରଫ କରି ବାଲେଶ୍ୱର ଜେଲରେ ରଖାଯାଇଥିଲା । ୨ ମାସ ରହିବା ଭିତରେ ଅନ୍ତେବାସୀଙ୍କୁ ଏକାଠି କରିଥିଲେ । ସ୍ୱାଧୀନତା ପାଇଁ ଲଢେଇ ଚାଲିଥିଲା । ପରେ ତାଙ୍କୁ ତିହାର ଜେଲ ଯିବାକୁ ପଡ଼ିଥିଲା । ସେଠାରେ ୧୨ ମାସ ରହିଲେ । ଜେଲରୁ ମୁକୁଳିବା ବେଳକୁ ଭାରତରୁ ଇଷ୍ଟଇଣ୍ଡିଆ କମ୍ପାନି ବିଦା ହୋଇ ସାରିଥିଲା ।

୪ ଭାଇ ଭିତରେ ସବା ସାନ ଥିଲେ ଶାରଦା ପ୍ରସାଦ ରାୟ । ବଡ଼ ଭଇ ବରଦା ପ୍ରସାଦ ରାୟ ବି ସଂଗ୍ରାମୀ ଥିଲେ । ଆଜାଦ ହିନ୍ଦ ଫୌଜରେ ସାମିଲ ହୋଇଥିଲେ । ୧୪ ବର୍ଷ ବୟସରେ ଘର ଛାଡ଼ି ଦେଇଥିଲେ । ଲୁଚିକି ଯାଇଥିଲେ । ଇରମ ଗୁଳିକାଣ୍ଡରେ ମାଡ଼ ଖାଇଥିଲେ । ତାଙ୍କ ସାନ ପୁଅ ମହେଶ ଚନ୍ଦ୍ର ରାୟଙ୍କ କହିବାନୁଯାୟୀ, କରୋନା ପାଇଁ ବାପାଙ୍କର ବଡ଼ ଅବଶୋଷ ରହିଗଲା । ସେ ରାଷ୍ଟ୍ରପତି ଭବନ ଯାଇପାରିଲେ ନାହିଁ । ୨୦୨୧ ମସିହାରେ ସ୍ୱାଧୀନତା ସଂଗ୍ରାମୀ ଭାବେ ରାଷ୍ଟ୍ରପତି ସ୍ୱତନ୍ତ୍ର ସୈନିକ ସମ୍ମାନ ପାଇଥିଲେ । ହେଲେ କଟକଣା ପାଇଁ ରାଷ୍ଟ୍ରପତି ଭବନ ମନା ଥିଲା । ଭଦ୍ରକର ତତ୍କାଳୀନ ଜିଲ୍ଲାପାଳ ଜ୍ଞାନ ଦାସଙ୍କଠାରୁ ରାଷ୍ଟ୍ରପତିଙ୍କ ସମ୍ମାନ ଗ୍ରହଣ କରିଥିଲେ । ବୋଧହୁଏ ବାପା ଏହି ସମ୍ମାନ ପାଇଁ ଅପେକ୍ଷା କରିଥିଲେ । ଏହା ପରେ ପରେ ତାଙ୍କର ପରଲୋକ ହୋଇଥିଲା ।

ବହୁ ବିଳମ୍ବରେ ଭାରତ ସରକାର ତାଙ୍କୁ ଏହି ସମ୍ମାନ ଦେଇଥିବା ତାଙ୍କ ପରିବାର ପ୍ରକାଶ କରିଛନ୍ତି । ୪ ପୁଅ ଓ ୨ ଝିଅଙ୍କୁ ନେଇ ତାଙ୍କ ପରିବାର । ସେମାନେ ହେଲେ କିଶୋର ଚନ୍ଦ୍ର ରାୟ, ସୁବାସ ଚନ୍ଦ୍ର ରାୟ, ରାମଚନ୍ଦ୍ର ରାୟ, ସାନ ପୁଅ ମହେଶ ଚନ୍ଦ୍ର ରାୟ, ମମତାଞ୍ଜଳି ରାୟ, ଜ୍ୟୋତ୍ସ୍ନାରାଣୀ ରାୟ । ପତ୍ନୀ କମଳା କୁମାରୀ ରାୟଙ୍କର ୨୦୨୧ ମସିହା ନଭେମ୍ବର ୬ ତାରିଖରେ ଦେହାନ୍ତ ହୋଇଥିଲା । ପରେ ପରେ ୨୦୨୨ ମସିହା ଜୁନ ୬ ତାରିଖରେ ବାପା ବି ବୋଉଙ୍କ ପଥ ଅନୁସରଣ କଲେ ବୋଲି ସାନପୁଅ ମହେଶ କହିଛନ୍ତି ।