ଦିଲ୍ଲୀ ଆକାଶରେ କଳାଧୂଆଁ, ଏକ୍ୟୁଆଇ ୪୦୦ ପାର୍; ଅନାବଶ୍ୟକ ନିର୍ମାଣ, ଡିଜେଲ୍ ଟ୍ରକ୍ ପ୍ରବେଶ ଉପରେ ବ୍ୟାନ୍ – Ibnodisha
[ad_1]
ନୂଆଦିଲ୍ଲୀ: ଦିଲ୍ଲୀର ବାୟୁ ଗୁଣବତ୍ତା ଲଗାତାର ବିଷାକ୍ତ ହେବାରେ ଲାଗିଛି । ଗୁରୁବାର ଦିଲ୍ଲୀ ଆକାଶରେ କଳାଧୂଆଁର ଆସ୍ତରଣ ଅଧିକ ଘନୀଭୂତ ହେବା ଫଳରେ ରାଜଧାନୀରେ ଅନ୍ଧାର ହୋଇପଡ଼ିବା ସହ ନିଃଶ୍ୱାସ ପ୍ରଶ୍ୱାସ ନେବାରେ ସମସ୍ୟା ସୃଷ୍ଟି ହୋଇଛି । ସଫର୍-ଇଣ୍ଡିଆ ରିପୋର୍ଟ ଅନୁସାରେ ଦିଲ୍ଲୀର ବାୟୁ ସ୍ତର (ଏକ୍ୟୁଆଇ) ୩ ବର୍ଷ ପରେ ସବୁଠୁ ଖରାପ ରେକର୍ଡ କରାଯାଇଛି । ଅନେକ ସ୍ଥାନରେ ବାୟୁ ଗୁଣବତ୍ତା ସୂଚକାଙ୍କ (ଏକ୍ୟୁଆଇ) ୪୦୦ ମାର୍କ ଅତିକ୍ରମ କରି ଗମ୍ଭୀର ଶ୍ରେଣୀରେ ପ୍ରବେଶ କରିଥିବା ଭାରତୀୟ ପାଣିପାଗ ବିଭାଗର ଜଣେ ଅଧିକାରୀ କହିଛନ୍ତି ।
ସକାଳ ୭ଟା ବେଳେ ଭିଜିବିଲିଟି ୫୦୦ ମିଟରକୁ ହ୍ରାସ ପାଇଥିଲା । ତେବେ ଦିନ ବଢ଼ିବା ସହିତ ଏହା ଧୀରେ ଧୀରେ ୮୦୦ ମିଟରକୁ ବୃଦ୍ଧି ପାଇଥିଲା । ଏପରି ସ୍ଥିତିରେ କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି) ଗୁରୁବାର ଦିଲ୍ଲୀ ଏବଂ ଏନ୍ସିଆର୍ରେ ଅନାବଶ୍ୟକ ନିର୍ମାଣ ଗତିବିଧି ଏବଂ ସହରରେ ଡିଜେଲ୍ ଟ୍ରକ୍ ପ୍ରବେଶ ଉପରେ ବ୍ୟାନ୍ ଲାଗୁ କରିଛି । ସିପିସିବି ଅନୁସାରେ ଗ୍ରେଡେଡ୍ ଆକ୍ସନ୍ ପ୍ଲାନ୍ର ଷ୍ଟେଜ୍-୩ ଅଂଶସ୍ୱରୂପ କେତେକ ଅନ୍ୟ ଉପାୟ ମଧ୍ୟ ଲାଗୁ କରାଯିବ । ସିପିସିବି ତଥ୍ୟ ଅନୁସାରେ ୨୦୨୦ରେ ଦିଲ୍ଲୀର ହାରହାରି ଏକ୍ୟୁଆଇ ୨୫୭ ରେକର୍ଡ କରାଯାଇଥିଲା । ଏହା ବ୍ୟତୀତ ଅକ୍ଟୋବର ୨୦୨୧ରେ ଏକ୍ୟୁଆଇ ୧୭୩ ଏବଂ ଅକ୍ଟୋବର ୨୦୨୨ରେ ୨୧୦ ରେକର୍ଡ ହୋଇଥିଲା ।
ଦିଲ୍ଲୀର ଆଖପାଖ ରାଜ୍ୟ ପଞ୍ଜାବ, ହରିଆନାରେ ଚାଷଜମିରେ ନଡ଼ା ଜାଳିବା ଏବଂ ଦିଲ୍ଲୀରେ କମ୍ ବର୍ଷା ପ୍ରଦୂଷଣ ବୃଦ୍ଧିର କାରଣ ବୋଲି କୁହାଯାଉଛି । ଦେଶର ଉତ୍ତର ଭାଗରେ ଏବେ ବି ଚାଷ ଜମିରେ ନଡ଼ା ଜାଳିବା ଜାରୀ ରହିଛି । ଫଳରେ ଦିଲ୍ଲୀ, ନୋଏଡ଼ା, ଗୁରୁଗ୍ରାମ ଏବଂ ଏହାର ଆଖପାଖ ଅଞ୍ଚଳର ବାୟୁରେ ଧୂଆଁ ମାତ୍ରା ବଢ଼ିବାରେ ଲାଗିଛି । ଏହାକୁ ନେଇ ସ୍ୱାସ୍ଥ୍ୟ ବିଶେଷଜ୍ଞମାନେ ଚିନ୍ତାବ୍ୟକ୍ତ କରିଛନ୍ତି । କ୍ରନିକ୍ ବ୍ରୋଙ୍କାଇଟିସ୍ ଓ ଆଜ୍ମା ଭଳି ଶ୍ୱାସ ସମସ୍ୟାରେ ପୀଡ଼ିତ ବ୍ୟକ୍ତି ନିୟମିତ ଭାବେ ଔଷଧ ସେବନ ସହ ଅତ୍ୟନ୍ତ ଆବଶ୍ୟକ ନଥିଲେ ବାହାରକୁ ନବାହାରିବା ପାଇଁ ପରାମର୍ଶ ଦିଆଯାଇଛି । ସେହିପରି ଘରେ ଏୟାର୍ ପ୍ୟୁରିଫାୟର୍ ବ୍ୟବହାର କରିବାକୁ ସଫଦରଜଙ୍ଗ ହସ୍ପିଟାଲ୍ ମେଡିସିନ୍ ବିଭାଗ ମୁଖ୍ୟ ଡା. ଯୁଗଳ କିଶୋର ଦିଲ୍ଲୀବାସୀଙ୍କୁ ପରାମର୍ଶ ଦେଇଛନ୍ତି ।
ଦିଲ୍ଲୀ ପରିବେଶ ମନ୍ତ୍ରଣାଳୟ ଅନୁସାରେ ଦିଲ୍ଲୀ-ଏନ୍ସିଆର୍ରେ ଗ୍ରାପ୍-୨ ଅନୁସାରେ କୋଇଲା ଏବଂ କାଠର ଉପଯୋଗ ଉପରେ ବ୍ୟାନ୍ ଲଗାଯାଇଛି । ଏହା ବ୍ୟତୀତ ସିଏନ୍ଜି ଏବଂ ଇଲେକ୍ଟ୍ରିକ୍ ବସ୍ର ଅଧିକ ଚଳାଚଳ, ସଡ଼କ ନିୟମ ସଫେଇ କରିବା ସହିତ ପାଣି ସିଞ୍ଚନ ଏବଂ ଟ୍ରାଫିକ୍ ଜାମ୍କୁ ରୋକିଲେ ପ୍ରଦୂଷଣ ନିୟନ୍ତ୍ରିତ କରାଯାଇପାରିବ ବୋଲି କୁହାଯାଇଛି । ଗ୍ରେଡେଡ୍ ରେସ୍ପନ୍ସ-ଆକ୍ସନ୍ ପ୍ଲାନ୍ (ଗ୍ରାପ୍) ଦିଲ୍ଲୀ ଏବଂ ଏନ୍ସିଆର୍ରେ ପ୍ରଦୂଷଣ ମୁକାବିଲା ନିମନ୍ତେ ପ୍ରସ୍ତୁତ ଏକ ନିୟମ ଓ ଉପାୟ ।
[ad_2]
