ଯାଜପୁର: ମାତାଲ ଶିକ୍ଷକ ସସପେଣ୍ଡ । ସ୍କୁଲ ଚାଲିଥିଲା ସମୟରେ ସ୍କୁଲ ଭିତରେ ମଦ ପିଇ ମାତାଲ ଅବସ୍ଥାରେ ଶିକ୍ଷକ ଗଡୁଥିବା ଭିଡିଓ ଭାଇରାଲ୍ ହୋଇଛି । ଭିଡିଓ ଭାଇରାଲ୍ ପରେ ମଦୁଆ ଶିକ୍ଷକ ପ୍ରଦୀପ କୁମାର ଦାସଙ୍କୁ ନିଲମ୍ୱିତ କରାଯାଇଛି ।
ସୂଚନା ଅନୁସାରେ ଯାଜପୁର ଜିଲ୍ଲା ଦଶରଥପୁର ବ୍ଲକର ଜାଫରପୁର ପଞ୍ଚାୟତ ବାଲିସାହି ପ୍ରାଥମିକ ବିଦ୍ୟାଳୟର ଶିକ୍ଷକ ପ୍ରଦୀପ ଦାସ ମଦ ପିଇ ମାତାଲ ହୋଇଥିବା ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା ।
ସ୍ଥାନୀୟ ଲୋକେ ମାତାଲ ଶିକ୍ଷକଙ୍କୁ ଉଠାଇବାକୁ ଏବଂ ହୋସକୁ ଆଣିବାକୁ ଚେଷ୍ଟା କରିଥିବା ଭିଡିଓରେ ଦେଖିବାକୁ ମିଳିଥିଲା । ଶିକ୍ଷକ ଜଣକ ମଦ ନିଶାରେ ଏମିତି ଚୁର ଥିଲେ ଯେ ଠିକରେ କଥା କହିପାରୁନଥିଲେ କି ଉଠିପାରୁ ନଥିଲେ । ସ୍କୁଲରେ ଜଣେ ଶିକ୍ଷକଙ୍କ ଏଭଳି କାର୍ଯ୍ୟକୁ ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଏହି ଘଟଣାରେ ସମ୍ପୃକ୍ତ ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଶିକ୍ଷକଙ୍କୁ ଚାକିରିରୁ ନିଲମ୍ବିତ କରାଯାଇଥିବା ଡିଇଓ ନିବେଦିତା ପାଣି ସୂଚନା ଦେଇଛନ୍ତି ।
