ଓଡ଼ିଶାରେ ୪୭ ଡ୍ରଗ୍‌ସ ଇନ୍ସପେକ୍ଟର ପଦବି ଖାଲି, ନିଯୁକ୍ତି ପ୍ରକ୍ରିୟାକୁ ନେଇ କୋର୍ଟରେ ମାମଲା

ନିର୍ଦ୍ଦେଶାଳୟରୁ ମିଳିଥିବା ସୂଚନା ଅନୁଯାୟୀ, ୪୭ଟି ଡିଆଇ ପଦବିରେ ନିଯୁକ୍ତି ପ୍ରକ୍ରିୟା ଶେଷ ହୋଇଥିଲା। ହେଲେ ନିଯୁକ୍ତି ପ୍ରକ୍ରିୟାରେ ଅନିୟମିତତା ଅଭିଯୋଗ ନେଇ ପରୀକ୍ଷାର୍ଥୀମାନେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ହାଇକୋର୍ଟରେ ଏହା ବିଚାରାଧୀନ ରହିଛି । ଫଳରେ ନିଯୁକ୍ତି ପ୍ରକ୍ରିୟା ବାଧାପ୍ରାପ୍ତ ହୋଇଛି । ପୁଣି ଥରେ ପରୀକ୍ଷା ହେବା ନେଇ ସୂଚନା ମିଳିଛି ।

ନିର୍ଦ୍ଦେଶାଳୟରେ ୬୬ଟି ଡ୍ରଗ୍ସ ଇନ୍ସପେକ୍ଟର (ଡିଆଇ) ପଦବି ମଧ୍ୟରୁ ୪୭ ପଦବି ଖାଲି ପଡ଼ିଛି । ୧୯ଟି ପଦବିରେ ବର୍ତ୍ତମାନ ଆସିଷ୍ଟାଣ୍ଟ ଡ୍ରଗସ୍ କଣ୍ଟ୍ରୋଲରମାନେ ଯୁଗ୍ମ ଦାୟିତ୍ୱ ତୁଲାଉଥିବାରୁ ସେମାନେ ଚାପଗ୍ରସ୍ତ ରହୁଥିବା ଅଭିଯୋଗ ହୋଇଛି । ଫଳରେ ନକଲି ଔଷଧ କାରବାର ସହିତ ବେଆଇନ କାର୍ଯ୍ୟ ଉପରେ ନଜର ରଖିବାରେ ବାଧା ସୃଷ୍ଟି ହେଉଛି । ଗତବର୍ଷ ୧୦ କୋଟିର ନକଲି ଔଷଧ ଧରାପଡ଼ିଥିଲାବେଳେ ୧୦ଜଣଙ୍କୁ ଗିରଫ କରାଯାଇଥିଲା । ହେଲେ ବର୍ଷେ ହେଲାଣି ରାଜ୍ୟରେ ନକଲି ଔଷଧ କାରବାର ଧରପଗଡ଼ ନେଇ କିଛି ପଦକ୍ଷେପ ନିଆଯାଇନାହିଁ ।

ସ୍ୱାସ୍ଥ୍ୟ ବିଭାଗ ଜଣେ ବରିଷ୍ଠ ଅଧିକାରୀ କହିଛନ୍ତି, ପୂର୍ବରୁ ନକଲି କାରବାର ନେଇ ରାଜ୍ୟ ଟାସ୍କଫୋର୍ସ (ଏସ୍ଟଏଫ୍) ଗଠନ ହୋଇଥିଲା । ଯାହାଫଳରେ ରାଜ୍ୟରେ ନକଲି କାରବାର ସମ୍ପର୍କରେ ପର୍ଦ୍ଦାଫାସ ହେଉଥିଲା । ବର୍ତ୍ତମାନ ଏସ୍ଟିଏଫ୍ର ଦକ୍ଷତା ବୃଦ୍ଧି କରିବାକୁ ଚିନ୍ତା କରାଯାଉଛି । ଖୁବ୍ଶୀଘ୍ର ଏକ ଉଚ୍ଚସ୍ତରୀୟ ବୈଠକ ଡକାଯାଇ ଏନେଇ ନିଷ୍ପତ୍ତି ହେବ । ବେଆଇନ ଔଷଧ କାରବାର ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଏସ୍ଟିଏଫ୍ ସଦସ୍ୟଙ୍କୁ ଗିରଫ କରିବା କ୍ଷମତା ପ୍ରଦାନ ନେଇ ପ୍ରସ୍ତାବ ମଧ୍ୟ ରହିଛି ବୋଲି ଅଧିକାରୀ ଜଣଙ୍କ ସୂଚନା ଦେଇଛନ୍ତି ।